რამდენად ეფექტურია Sinovac-ი - თამარ გაბუნიას განმარტება 

ჯანდაცვის მინისტრის მოადგილე თამარ გაბუნია განმარტავს ჩინური წარმოების ვაქცინის Sinovac-ის ეფექტურობას. 

მისი თქმით, პირველი მონაცემები ბრაზილიის კვლევიდან არსებობს, სადაც ვაქცინამ ინფექციის გადაცემის კუთხით 56%-იანი ეფექტურობა აჩვენა. თუმცა, მძიმე შემთხვევების და სიკვდილიანობის თავიდან აცილების თვალსაზრისით ეფექტურობა 90%-ს აჭარბებს. 

ამასთან, მინისტრის მოადგილის ინფორმაციით, გამოქვეყნდა ინდონეზიაში ჩატარებული კვლევის შედეგებიც, სადაც Sinovac გამოიყენეს, იქ ვაქცინის ეფექტურობის მაჩვენებელი ბევრად მაღალია - 86%. 

“ამდენად, Sinovac-ის მაჩვენებლები და პოტენციალი, რომ დაიცვას ადამიანი, როგორც ინფიცირებისგან, ასევე ლეტალური და მძმე შემთხვევებისგან, საკმაოდ მაღალია. ჯანმოს ექსპერტების მიერ გამოქვეყნებული კარგი დასვკნაც სწორედ ამას ემყარება“, - აღნიშნა თამარ გაბუნიამ. 

ინფორმაციისთვის, Sinovac-ით ვაქცინაცია მომდევნო კვირიდან იგეგმება. საქართველოს ჩინეთმა ვაქცინის 100 000 დოზა აჩუქა.