პრემიერი ანაკლიაზე: ხაზარაძემ და მისმა ჯგუფმა $3 მლნ დახარჯეს და არაფერი გააკეთეს

პრემიერ-მინისტრი ირაკლი ღარიბაშვილი მამუკა ხაზარაძეს ანაკლიის პორტის მშენებლობის პროექტთან დაკავშირებით უმოქმედობაში ადანაშაულებს.

პრემიერის თქმით, ანაკლიის განვითარების კონსორციუმმა 3 მილიონი დოლარი დახარჯა, თუმცა რეალურად არაფერი გაუკეთებიათ.

“შედარებისთვის ვიტყვი, ბიძინა ივანიშვილმა საკუთარი ჯიბიდან დახარჯა 3 მილიარდი დოლარი ჩვენი ქვეყნისთვის და ჩვენი მოქალაქეებისთვის, მამუკა ხაზარაძემ ანაკლიის პროექტისთვის, რომელსაც ის თავად უწოდებს საუკუნის პროექტს, დახარჯა 3 მილიონი დოლარი. დღეს ხაზარაძე და მისი ჯგუფი წასულია უცხოეთის სასამართლოში და ქვეყანას უჩივის 1.5 მილირიად დოლარს, რომ ქვეყანას, ჩვენს ხალხს წაგლიჯოს ეს თანხა. თქვენეული ხედვა არ არის საუკუნის პროექტი, ეს არის საუკუნის ძარცვის პროექტი, მაშინ, როცა მთავრობამ ყველაფერი გააკეთა, ყველა პრემიერის დროს ანაკლიის პროექტს სრული მხარდაჭერა ჰქონდა, მთავრობამ დახარჯა 60 მილიონი ლარი, 300 მილიონი ლარი ჰქონდა აღებული ვალდებულება, მიწები გამოისყიდა, შემდეგ 100 მილიონი დოლარი ჰქონდა ასევე ვალდებულების სახით აღებული და 4-ჯერ გადაუვადეს შესრულება. დღეს რომ ჩახვალთ ანაკლიაში, ნახავთ, რომ იქ არის ქვიშის გორები და ხალხი ვერ სუნთქავს. დაიწყეს რაღაც სამუშაოები, ჩემი ინფორმაციით, ხაზარაძის და მისი ჯგუფის მიერ 3 მილიონი დოლარი არის დახარჯული და რეალურად შესრულებულია არაფერი. ამბობენ, რომ დახარჯეს 80 მილიონი, დავუშვათ დახარჯეს ეს თანხა, მაინც უჩუვიან 1.5 მილიარდს ჩვენს გაღარიბებულ ქვეყანას. ამდენი ფარისევლობა და სიყალბე დამღუპველია ჩვენი ქვეყნისთვის და მოქალაქეებისთვის“,- აღნიშნა ირაკლი ღარიბაშვილმა მამუკა ხაზარაძის განცხადების საპასუხოდ.