ჯანდაცვა
13/01/2023
რას გულისხმობს რეფერენტული ფასები მედიკამენტებზე - ჯანდაცვის მინისტრის განმარტება
ფარმაცევტული ბაზარი მედიკამენტებზე ფასებს თავისი სურვილით მომავალი კვირიდან ვეღარ დააწესებს - 15 იანვრიდან გარკვეული დასახელების მედიკამენტის ღირებულებაზე ზედა ზღვარი დაწესდება.
ახალი რეგულაციის ამოქმედებასთან დაკავშირებით ფარმაცევტული კომპანიები ვალდებულნი იქნებიან ჯანდაცვის სამინისტროსთვის ხელმისაწვდომი გახადონ საინფორმაციო ბაზები მედიკამენტების ნაშთების და ფასების შესახებ.
როგორ მოხდება კანონის აღსრულება და რა მოლოდინები აქვს უწყებას ჯანდაცვის მინისტრმა გადაცემაში "ბიზნესი რუსთავი 2"-ზე ისაუბრა.
ზურაბ აზარაშვილმა აღნიშნა, რომ ნოემბერში შესული ცვლილებების შემდეგ, 15 იანვრიდან განისაზღვრება რეფერენტული ფასი, პირველ ეტაპზე კი ეს შეეხება 40 აქტიურ ნივთიერებას, სხვადასხვა ფორმა-დოზის მიხედვით ეს შეეხება 2000-ზე მეტ მედიკამენტს.
დაწესებული ფასების გადასახედად სექტორს 15 იანვრიდან 15 დღე ექნებათ და თუ რომელიმე ფასზე არგუმენტირებული პოზიცია ექნება სექტორს, მინისტრის თქმით, საკითხი განიხილება.
"ამისთვის შეიქმნა სპეციალური საბჭო, რომელიც ფასებს ადგენს, განიხილავს საჩივრებსაც და უკვე 15 თებერვლიდან სრულად შევა ძალაში და ყველა კომპანია იმპორტიორი, დისტრიბუტორი თუ საცალო ქსელში მოვაჭრე ვალდებული იქნება ამ ფასების მიხედვით დააწესონ მაქსიმალური ფასი," - განაცხადა ზურაბ აზარაშვილმა.
როგორც მინისტრმა გადაცემაში ახსნა, რეფერენტული ფასი გულისხმობს მაქსიმალური ჭერის განსაზღვრას და სწორედ ამ ფასის ქვემოთ იქნება კონკურენცია კომპანიებსა და აფთიაქებს შორის.
მიუხედავად იმისა, რომ კომპანიებთან და სექტორის წარმომადგენლებთან ამ საკითხის განხილვა გასული წლის დასაწყისიდან დაიწყო, კომპანიებს ჯერ კიდევ აქვთ ვადა ახალ სისტემაზე გადასაწყობად.
მინისტრმა აღნიშნა, რომ ახალი რეგულაციების ამოქმედების ფონზე წამლის კანონში ჩაიდო კონტროლის მექანიზმი და ბერკეტი, რომელიც ითვალისწინებს საბითუმო თუ საცალო ქსელისთვის ვალდებულებას, რომ რეგულირების სააგენტოს გამოუჩნდეს მათი ნაშთები, მედიკამენტების ჩამონათვალი, ფასები და სხვა.
"ეს არის მნიშვნელოვანი მექანიზმი იმ მიზნებისთვის, რომელიც დაკავშირებულია არა მხოლოდ რეფერენტული ფასების, არამედ ასევე ელექტრონული რეცეპტების გამოწერასთან, მედიკამენტების მოძრაობასთან ქვეყანაში რომ არ შეიქმნას ხელოვნური დეფიციტი", - განაცხადა ჯანდაცვის მინისტრმა.
რაც შეეხება ბაზების გახსნას, ზურაბ აზარაშვილის თქმით, მნიშვნელოვანია მიკვლევადობის სისტემის შექმნა, რომელიც მსოფლიოს ბევრ ქვეყანაში მოქმედებს და იმპორტირებული თუ ადგილობრივი წარმოების მედიკამენტის შტრიხ კოდის მიხედვით მარეგულირებელს თუ მომხმარებელს შესაძლებლობა ექნება ნახოს წარმოების ქვეყანა, ვადა, რაც ფალსიფიცირებისა და ვადაგასული მედიკამენტების გადაფუთვისგან დაზღვევის შესაძლებლობას იძლევა.
