კომპანიამ "შატილი" შოკოლადის კარაქის წარმოება აღადგინა
კარაქის მწარმოებელმა კომპანიამ "შატილი" შოკოლადის კარაქის წარმოება აღადგინა.
როგორც კომპანიის წარმომადგენელი თიკო ჩხეიძე "ბიზნესპარტნიორთან" აცხადებს, აღნიშნული პროდუქტის წარმოება საწარმოში 10-15 წლის წინაც ხდებოდა, თუმცა, გარკვეული პრობლემების შედეგად,მისი წარმოება შეწყდა.
ჩხეიძის ინფორმაციით, "შატილის" მენეჯმენტმა ბაზრის შესწავლის შედეგად სწორედ ამ გემოს აღდგენა გადაწყვიტა. მისი ინფორმაციით, შოკოლადის კარაქი ხვალიდან "გუდვილის" და "ლიბრეს" სავაჭრო ქსელში გაიყიდება, სამომავლოდ კი განიხილება სხვადასხვა სავაჭრო კომპანიებთან თანამშრომლობა.
როგორც კომპანიის წარმომადგენელი აცხადებს, ეს იქნება სატესტო პარტია,მასიურ წარმოებაზე კი კომპანია მხოლოდ მას შემდეგ გადავა, რაც გაყიდვების პირველი შედეგი დაიდება.
"კონკურენტები არ გვყავს, რადგან შოკოლადის კარაქის წარმოება საქართველოში არ ხდება. ის რაც იმპორტით შემოდის, არის კრემი და არა კარაქი. შესაბამისად, გვაქვს მოლოდინი, რომ ამ პროდუქტს დიდი გამოხმაურება ექნება,"-აცხადებს ჩხეიძე.
კომპანია "შატილის" მწარმოებელი საწარმო თბილიშში, მოსკოვის გამზირზე მდებარეობს. კომპანია 2 სახეობის კარაქს (ნაღების კარაქი და სპრედი) 2001 წლიდან აწარმოებს.
