"ქარი" საუკეთესო მომსახურების შექმნისთვის ბიზნესდაჯილდოება 2021-ის გამარჯვებული გახდა
თიბისის ბიზნესდაჯილდოება 2021-ის ნომინაციაში საუკეთესო პროდუქტის ან მომსახურების შექმნისთვის გაიმარჯვა კომპანიამ, რომელიც მომავლის სატრანსპორტო მომსახურებას ქმნის. "ელექტროტრანსპორტი არის მომავალი", - ამბობს "ქარის" დამფუძნებელი დანიელ დონეციანი, რომელმაც აპლიკაციის საშუალებით მოპედების გაზიარების სერვისი შექმნა.
"ქარი" ეკო-მეგობრული ელექტრომოპედების საზიარო სერვისია, რომელიც შეიქმნა ურბანულ პირობებში სწრაფი და მარტივი გადაადგილებისთვის. მოპედების გამოყენება შესაძლებელია "ქარის" აპლიკაციით, რომელიც უშუალოდ სამგზავრო დანიშნულების გარდა მომხმარებელთან საკომუნიკაციო ეფექტურ არხადაც მოქმედებს.
სერვისის საზიარო ბუნება მომხმარებელს ათავისუფლებს მოპედის მოვლა-პატრონობასთან დაკავშირებული უხერხულობებისგან, ხოლო მთავარი ბენეფიტები რჩება: 24/7 ხელმისაწვდომობა, საცობებში მოძრაობის თავისუფლება, გარანტირებული საპარკინგე ზონები, ეკო-მეგობრულობა და ასე შემდეგ.
შეგახსენებთ, რომ თიბისის ბიზნესდაჯილდოება 2021 განახლებული ფორმატით ჩატარდა და გამარჯვებულები გამოავლინა. წელს დაჯილდოებას ორი ახალი ნომინაცია დაემატა: საუკეთესო ბიზნესთანამშრომლობისთვის და გამორჩეული როლისთვის რეგიონის განვითარებაში. კონკურსში 360-მა კომპანიამ მიიღო მონაწილეობა, მათგან საუკეთესოები კი დამოუკიდებელმა ჟიურიმ გამოარჩია.
