ვალერი ჩეხერია: საქართველოს შეუძლია სპა კურორტებით ბადენ-ბადენს გაუწიოს კონკურენცია

"სპა და გამაჯანსაღებელი კურორტები, ფერმერული განვითარება და სუფთა საკვები - ეს ზუსტად ის მიმართულებებია, რითაც ერთ-ერთი მსხვილი გერმანული კომპანიაა Slow group-ია დაინტერესებული“- ამის შესახებ Slow group-ის პარტნიორმა და ბიზნესის განვითარების დირექტორმა ვალერი ჩეხერიამ გადაცემაში "ბიზნესპარტნიორი" ისაუბრა.

მისი თქმით, დღეს მახალმხარჯველიანი მოგზაურები ეძებენ ახალ მიმართულებებს, როგორიცაა სპა და სამკურნალო დანიშნულების კურორტები, რომლის უდიდესი პოტენციალიც აქვს საქართველოს.

"ეს არის წყლები, ტალახი, ჰაერი, და სხვადასხვა მიმართულებები. ძალიან ბევრი კურორტი არსებობდა საბჭოთა კავშირის დროს, რომელიც მივატოვეთ და არ ფუნქციონირებს. უნდა მოხდეს მათი იდენტიფიკაცია, რომ გავიგოთ რა დადებითი და უარყოფითი მხარეები არსებობს. როდესაც ზუსტად გავიგებთ თუ რა რესურსი გაგვაჩნია და როგორია რეალური პოტენციალი, ამის შემდეგ შესაძლებელი იქნება პაკეტის შემქნა და ინვესტორებისთვის შეთავაზება,

როგორც იცით, ვმუშაობ ევროპასა და ამერიკაში და შემიძლია ვთქვა, რომ ინვესტორების მხრიდან ყველაზე დიდი ინტერესი გამაჯანსაღებელი კურორტების მიმართ არის. იმდენად გაძვირებულია მსოფლიოში ამ მიმართულებით მოგზაურობა, რომ შეგვიძლია ეს პოტენციალი გამოვიყენოთ და ისეთ ადგილებს გავუწიოთ კონკურენია, როგორიცაა თუნდაც ცნობილი საკურორტო ადგილი ბადენ-ბადენი, რომელიც თერმული წყლებით და გამაჯანსაღებელი სპა ცენტრებით არის განთქმული. ასევე სამთო-სათხილამურო კურორტებს, სადაც პაnდემიის გამო დასვენება ძალიან გაძვირებულია. ჩვენ კი ნაკლებ ფასად კარგი გადამხდელი ტურისტის მოზიდვა შეგვიძლია. კომუნიკაცია მაქვს ევროპის დიდ კომპანიებთან, რომლებიც ასევე აკვირდებიან საქართველოს, რადგან ახალი ბაზარია და შეუძლიათ ბევრად ნაკლები ინვესტიციით შექმნან ახალი მიმართულება."-განაცხადა ვალერი ჩეხერიამ.

მისივე თქმით, სახელმწიფომ უნდა იმუშაოს მიტოვებული ტერიტორიებისა და კურორტების ინფრასტრუქტურის გამართვაზე, ასევე გაკეთდეს სამედიცინო ცენტრები, რადგან დღეს მოგზაურის ყველაზე დიდი ინტერესი ბუნება, სუფთა საკვები, ჯანსაღი დასვენებაა.