თურქული ავიაკომპანიები ფრენის დაწყებას ქუთაისის აეროპორტიდანაც გეგმავენ
თურქეთსა და საქართველოს შორის ავიარეისების სიხშირეები იზრდება. თურქეთში სამუშაო ვიზიტის ფარგლებში, საქართველოს ეკონომიკის მინისტრის მოადგილემ მარიამ ქვრივიშვილმა თურქული ავიაკომპანიების წარმომადგენლებთან შეხვედრა გამართა.
„თურქეთის ავიახაზებისა“ და „პეგასუსის“ წარმომადგენლებთან შეხვედრაზე საუბარი საქართველოს მიმართულებით ავიარეისების ოთხივე სეზონზე შესრულებას შეეხო. გამოითქვა მზაობა, ზამთრის სეზონზე ბათუმის მიმართულებით ოპერირება კვირაში 5 სიხშირით გაგრძელდეს, რაც აჭარაში ტურისტული ნაკადების ზრდას კიდევ უფრო შეუწყობს ხელს.
აღინიშნა, რომ ავიაკომპანია „პეგასუსი“ საქართველოს მიმართულებით ანკარიდან ფრენებს იწყებს და პირველი ავიარეისი 2 ნოემბერს შესრულდება.
შეხვედრის ფარგლებში, საუბარი ასევე შეეხო ქუთაისის საერთაშორისო აეროპორტის მიმართულებით „თურქეთის ავიახაზებისა“ და ავიაკომპანია „პეგასუსის“ მიერ შესაძლო ავიარეისების დანიშვნის საკითხს.
