TBC Capital: ეკონომიკა წელს 5.5%-ზე მეტად გაიზრდება

წელს ქვეყანაში ეკონომიკა 5.5%-ზე მეტად გაიზრდება, - ვარაუდობს თიბისი კაპიტალი. ეს მაჩვენებელი დეკემბრის პროგნოზს აღემატება.

როგორც TBC Capital-ის მთავარი ეკონომისტის განახლებულ ანგარიშშია ნათქვამი, საქართველოში, ინფიცირებისა და სიკვდილიანობის მაჩვენებლები კვლავ პრობლემურია, თუმცა, იანვრის წინასწარი მაჩვენებლების მიხედვით, ტურიზმის აღდგენის დინამიკა მნიშვნელოვნად დაჩქარდა.

პუბლიკაციაში ძირითადად ყურადღება გამახვილებულია ქვეყანაში არსებულ ეპიდემიოლოგიურ მდგომარეობაზე, რადგან ბოლო დროს, ინფიცირების ახალი შემთხვევები უპრეცედენტო მასშტაბით ზრდას განაგრძობს. ამასთან, ომიკრონის შედარებით ნაკლები სიმწვავე უკვე დადასტურებულ ფაქტად მოიაზრება. ამ მხრივ, ასევე არგუმენტია, ინფიცირების მაღალი შემთხვევების მიუხედავად, საერთაშორისო ბაზრებზე სასტუმროებისა და ავიაკომპანიების ფასების მაღალი ღირებულება.

"ეს გვაძლევს საშუალებას ვივარაუდოთ, რომ 2022 წელს, ძირითადად უკვე სწორედ ტურიზმის აღდგენაზე დამოკიდებული ეკონომიკის ზრდა ჩვენს დეკემბრის, 5.5%-იან შეფასებაზე უფრო მეტი იქნება. ამასთან, უკრაინაში გეოპოლიტიკური ვითარების საომარ კონფლიქტში გადაზრდა მნიშვნელოვანი, თუმცა ჩვენი შეფასებით მართვადი რისკია. 2021 წელს, უკრაინისა და რუსეთის წილი ექსპორტში, ტურიზმში, გზავნილებსა და პირდაპირ უცხოურ ინვესტიციებში 6.8%-სა და 14.1% შეადგენდა"– განმარტავს TBC Capital  მთავარი ეკონომისტი.