"მყიდველთა 99% ქართველია" - იახტებზე მოთხოვნა გაიზარდა

საქართველოში იახტების გაყიდვების მაჩვენებელი რეკორდულია. ძირითადი მოთხოვნა საშუალო ზომის იახტებზეა, რომელთა ზომაც 10-დან 15-16 მეტრამდე მერყეობს. რაც შეეხება ფასს, ის 150 ათასი ევროდან იწყება და მას იახტის მოდელი და სპეციფიკაცია განსაზღვრავს. აღსანიშნავია, რომ საქართველოდან წელს იახტების პირველი რეექსპორტიც დაფიქსირდა და ის მეზობელ ქვეყანაში გაიყიდა.

იახტების იმპორტიორი კომპანია „Azimut Yachts საქართველოს“ წარმომადგენლობის ხელმძღვანელი გიორგი ჩიკვაიძეს „ბიზნესპარტნიორთან“ ამბობს, იახტებს საქართველოში, ძირითადად, ადგილობრივები ყიდულობენ.

„მყიდველების დიდი ნაწილი, 99% ქართველები არიან, რაც ძალიან გვახარებს, რადგან ამ ინდუსტრიის განვითარება იქნება დიდი წარმატების მომტანი. რაც შეეხება კონკურენციას, არ ვიცი ეს ცუდია, თუ კარგი, მაგრამ ჯერჯერობით, პირველი კომპანია ვართ, ვინც დაიწყო ამ დარგის განვითარება და საიახტო ინდუსტრიის საქართველოში შემოყვანა. დღესდღეობით, საქართველო არის განვითარების იმ ეტაპზე, რომ რაც მეტი კომპანია გამოჩნდება, უკეთესი იქნება პირველ რიგში ჩვენთვის, რომ შესადარებლად არსებობდეს კონკურენტი კომპანიებიც“, - განუმარტა „ბიზნესპარტნიორს“ გიორგი ჩიკვაიძემ.

ცნობისთვის, Azimut Yachts იტალიური იახტების მწარმოებელი კომპანიაა, რომლის ფილიალი საქართველოში 2017 წლიდან არსებობს.