ლევან დავითაშვილი: 2019 წელთან შედარებით რუსი ტურისტების რაოდენობა შემცირებულია

ტურიზმთან დაკავშირებით დადებითი დინამიკაა. ეკონომიკის მინისტრის განცხადებით, 2019 წელთან შედარებით, 65.3%-იანი აღდგენაა. 

თუმცა, მისი თქმით, ტრადიციული ბაზრებიდან ტურისტების რაოდენობა შემცირებულია. მთავრობა კი, კომპენსირების მიზნით, ტურისტების სხვა ქვეყნებიდან მოზიდვას ცდილობს. 

"სამწუხაროდ ჩვენ რიცხვებზე არ გვაქვს ხოლმე აქცენტი, ვსაუბრობთ უბრალოდ შეგრძნებებსა და აღქმებზე. 2019 წელთან შედარებით, საქართველოში რუსი ტურისტების რაოდენობა შემცირებულია. ასევე შემცირებულია ტურისტების რაოდენობა სხვა ტრადიციული ბაზრებიდან. მაქსიმუმს ვაკეთებთ იმისათვის, რომ გარკვეული ალტერნატივები შევქმნათ, ბაზრების დივერსიფიკაცია მოხდეს, კომპენსირება მოვახდინოთ დანაკარგების და სხვა ქვეყნებიდან მოვიზიდოთ ტურისტები. 

ტურიზმთან დაკავშირებით კარგი დინამიკა გვაქვს და ეს ძალიან მნიშვნელოვანია, რადგან მოსახლეობის შემოსავლებს უკავშირდება. ტურიზმი არის ის დარგი, რომელიც ძალიან ბევრი ადამიანის დასაქმებას ახდენს.

2019 წელთან შედარებით 65.3%-ით აღვადგინეთ ტურისტების რაოდენობა. 2019 წელთან შედარება ძალიან მნიშვნელოვანია, ამ დროს იყო პიკი. აჟიოტაჟი და ცრუ წარმოდგენები, რომ ჩვენთან ტურისტებს გადაჭარბებული რაოდენობაა, ეს არის ნება იმ ტენდენციების დაზიანების, რომელიც ჩვენ გვაქვს. 

საქართველომ მოახერხა, მთავრობისა და კერძო სექტორის მჭიდრო თანამშრომლობით, კარგი შედეგების მიღწევა. შემოსავალში 80.6%-იანი აღდგენაა. დაახლოებით 1.3 მლრდ დოლარი შემოსავალია, რაც ჩვენს ბევრ მოქალაქეზე თითქმის თანაბრად ნაწილდება", - აღნიშნა ლევან დავითაშვილმა.