გურჯაანის გასტრონომიული აკადემიის კურსდამთავრებულები მაღალანაზღაურებადი სამსახურებით იქნებიან გარანტირებულები

ახალგაზრდები, რომლებიც გურჯაანის გასტრონომიულ კადემიაში მიიღებენ განათლებას, მაღალანაზღაურებადი სამსახურებით იქნებიან გარანტირებულები, - ამის შესახებ „ბიზნესპარტნიორს“ გურჯაანში გასტრონომიული მიმართულების სკოლის პროექტის ინიციატორმა და დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ, დავით სონღულაშვილმა განუცხადა.

მისი ინფორმაციით, აკადემია 400 სტუნდეტს მიიღებს და აქ ახალგაზრდები შეძლებენ, ისწავლონ გასტრონომიასთან დაკავშირებით ყველაფერი - კულინარიიდან დაწყებული, რესტორნის მართვით დასრულებული.

„გურჯაანის კულინარიის აკადემიის პროექტი იქნება კერძო და საჯარო სექტორის პარტნიორობის საუკეთესო მაგალითი. სახელმწიფო უზრუნველყოფს სკოლის ინფრასტრუქტურას, ხოლო მართვაში შევა კავკასიის უნივერსიტეტი.

„კავკასიის უნივერსიტეტს უკვე დაწყებული აქვს საგანმანათლებლო პროგრამებზე მუშაობა და იქნება ძალიან საინტერესო პროგრამები, რომელთა გავლის შემდეგაც, როგორც საქართველოში, ისე მთელი ევროპის მასშტაბით, გურჯაანის კულინარიის აკადემიის კურსდამთავრებული მაღალანაზღაურებადი სამსახურების პოვნას შეძლებენ, დასაქმდებიან: საერთაშორისო სასტუმროების ქსელებში, რესტორნებში, რადგან ძალიან მოთხოვნად პროფესიას დაეუფლებიან“, - განმარტა დავით სონღულაშვილმა.

მისივე თქმით, სტუდენტების 15% უცხოელი იქნება და მათ მოზიდვასაც კავკასიის უნივერსიტეტი უზრუნველყოფს.

როგორც დავით სონღულაშვილი ამბობს, გურჯაანის კულინარიის აკადემია სავარაუდოდ 2024 წლის შემოდგომაზე, ან მაქსიმუმ 2025 წლის გაზაფხულზე გაიხსნება და ის მნიშვნელოვნად შეუწყობს ხელს გასტრონომიული ტურიზმის განვითარებას და ქართული გასტრონომიის შესახებ ცნობადობის ამაღლებას მსოფლიოს მასშტაბით.

შეგახსენებთ, ბასკეთის კულინარიული ცენტრის ხელშეწყობით, გურჯაანში გასტრონომიული მიმართულების აკადემიის მშენებლობა მიმდინარე წლის გაზაფხულზე დაიწყება. 

გასტრონომიის აკადემიის მშენებლობა 2022 წელს დაანონსდა. პროექტი საქართველოს განათლებისა და მეცნიერების სამინისტროს მხარდაჭერით ხორციელდება და  დაახლოებით 17 მლნ ლარია ინვესტიცია ხორციელდება.