ევროკავშირში მოგზაურობისთვის დამატებითი თანხის გადახდა ჯერ არ მოგიწევთ - რეგულაცია გადავადდა
ევროკავშირმა მოგზაურობის შესახებ ინფორმირებისა და ავტორიზაციის სისტემის (ETIAS) ამოქმედება გადაავადა.
როგორც ინფორმირებისა და ავტორიზაციის სისტემის (ETIAS) ოფიციალურ ვებგვერდზეა აღნიშნული, რეგულაცია, რომელიც 2023 წლის ნოემბრიდან უნდა ამუშავებულიყო, 2024 წელს შევა ძალაში.
ახალი წესის მიხედვით, სხვადასხვა ქვეყნის, მათ შორის საქართველოს მოქალაქეებმა, რომლებსაც ევროპის ქვეყნებში უვიზოდ ჩასვლა შეუძლიათ, გამგზავრების წინ უნდა შეავსონ ელექტრონული ანკეტა, რომელსაც სისტემა(ETIAS) დაამუშავებს და მოგზაური ავტორიზაციას ელექტრონული ფოსტით მიიღებს.
ელექტრონულ ანკეტაში მოქალაქეები მიუთითებენ პირად მონაცემებს, მათ შორის, დაბადების ადგილს, დაბადების თარიღს, მისამართს, ტელეფონის ნომერს, განათლებას და სამუშაო ადგილს.
ევროკომისიაში აცხადებენ, რომ ახალი სისტემის ამოქმედებით, ევროპაში მოგზაურობა უფრო უსაფრთხო გახდება. მომსახურების გადასახადი კი 7 ევროა.
შენგენის ზონაში შესასვლელად შვიდი ევროს გადახდა აუცილებელი იქნება 18-იდან 70 წლამდე ადამიანებისთვის, ხოლო 18 წლამდე და 70 წელს ზემოთ პირებს გადასახადი არ შეეხებათ.
შეგახსენებთ, ევროკავშირმა მეტი უსაფრთხოების უზრუნველსაყოფად ამ სისტემაზე მუშაობა 2016 წელს დაიწყო და მისი ამოქმედება თავდაპირველად 2022 წლის დასაწყისიდან იგეგმებოდა, თუმცა რამდენჯერმე გადაიდო.
