AK-Air Georgia: ავიაბილეთებზე მოთხოვნა საკმაოდ მაღალია

რუსეთ-უკრაინის ომმა პრობლემა არაერთი მიმართულებით შექმნა. მათ შორის, გაძვირდა საავიაციო საწვავიც. მიუხედავად იმისა, რომ ბოლო დღეების განმავლობაში, საერთაშორისო ბაზარზე ფასი შედარებით  შემცირდა, ნიშნული მაინც მაღალია.

როგორც ცნობილია, თუ აქამდე 1 ტონა საწვავი 400-500 დოლარი ღირდა, ახლა მისი ფასი გაორმაგებულია.

„ბიზნესპარტნიორი“ დაინტერესდა აისახება თუ არა საერთაშორისო ბაზარზე გაძვირებული საავიაციო ნავთის ფასი ავიაკომპანიების ბილეთებზე და როგორია მოლოდინები.

ავიაკომპანია AK-Air Georgia-ს დირექტორი ნინო ფერაძე აცხადებს, რომ მიუხედავად გაძვირებული ავიასაწავისა, ავიაბილეთებზე ფასი არც გაზრდილა და არც იგეგმება. „მომავალში რა იქნება არ ვიცი, თუმცა, ამ დროისთვის ეს საკითხი დღის წესრიგში არ დგას,“ - აცხადებს ფერაძე.

რაც შეეხება აქტივობას, ფერაძე აცხადებს, რომ ავიაბილეთებზე მოთხოვნა საკმაოდ მაღალია. მათ შორის არიან როგორც უცხოელი ტურისტები, ისე ადგილობრივი მოსახლეობა.

შეგახსენებთ, ავიაკომპანია AK-Air Georgia ნატახტარი-მესტია-ნატახტარის საჰაერო ხაზზე რეგულარულ რეისებს (კვირაში-4-5 რეისი) ახორციელებს. ავიაბილეთის ღირებულება ზრდასრულთათვის, ერთი გზა 90 ლარია.  თავის მხრივ, ავიაკომპანია  Vanilla Sky Georgia-ს შემადგენლობაში შედის, რომელიც ტურისტულ ბაზარზე 2008 წლიდანაა და მომხმარებელს ფართო სპექტრის მქონე არაერთ სერვისს სთავაზობს. მათ შორის, აქვს ავიატაქსის სერვისი, ტურისტული კომპანია, კომპლექსი ვანილა,ასევე ფლობს სასტუმროს და რესტორანს.