რა დაგიჯდებათ საქართველოში Starlink-ის ინტერნეტის ინსტალაცია და სერვისი
საქართველოში, Starlink-ის მაღალსიჩქარიანი ინტერნეტის სერვისის ყოველთვიური ღირებულება 160 ლარია. ამის შესახებ კომპანიის ოფიციალურ გვერდზეა განმარტებული.
კომპანიის ინფორმაციით, აპარატურის შესაძენად საჭიროა 1780 ლარი, ხოლო მისი ტრანსპორტირება 235 ლარი ღირს.
როგორც სოციალურ ქსელ X-ში მისმა მფლობელმა ილონ მასკმა დაწერა, Starlink-ის მაღალსიჩქარიანი ინტერნეტით სარგებლობა საქართველოშიც შესაძლებელია.
Starlink-ის ხელმისაწვდომობის რუკის მიხედვით, მაღალსიჩქარიან ინტერნეტზე წვდომა, სერვისის შეძენის შემთხვევაში, ექნება სრულიად საქართველოს, გარდა მისი ოკუპირებული ტერიტორიებისა.
Starlink-ი ილონ მასკის თანამგზავრული ინტერნეტის პროგრამაა. ინფორმაცია იმის შესახებ, რომ ილონ მასკის კომპანია SpaceX საქართველოს ბაზარზე თავისი პროდუქციის გაშვებაზე მუშაობდა, ცნობილი გასულ წელს გახდა.
ილონ მასკის დაარსებულმა კომპანია “SpaceX”-ის Starlink-მა კომუნიკაციების კომისიაში სატელიტური ინტერნეტ სერვისების მიწოდების მიზნით ავტორიზაცია 2022 წლის ივლისში გაიარა.
შეგახსენებთ, Starlink მსოფლიოში ერთ-ერთი მოწინავე სატელიტური ფართოზოლოვანი ინტერნეტ სისტემაა, რომელიც უზრუნველყოფს მაღალსიჩქარიან, დაბალი დაყოვნების მქონე ფართოზოლოვან ინტერნეტს მთელს მსოფლიოში, მათ შორის იმ ადგილებში, სადაც ინტერნეტ კავშირი დაბალი საიმედოობის, უხარისხო ან სრულიად მიუწვდომელია. SpaceX-ს დღეისათვის 2700-ზე მეტი Starlink-ის დაბალ ორბიტალური (LEO) თანამგზავრი ჰყავს გაშვებული.
Starlink განსაკუთრებით მნიშვნელოვანი და საინტერესო მაღალმთიან რეგიონებში ასევე ფართოზოლოვანი ინტერნეტ დაფარვის არმქონე დასახლებებშია. Starlink-ის დანერგვის შემდეგ ყველა ასეთ გეოგრაფიულ არეალში მაღალსიჩქარიან ინტერნეტზე წვდომა ნებისმიერი მსურველისთვის ხელმისაწვდომი იქნება.
