წელს მელიორაციაში ₾150 მლნ-ის პროექტები განხორციელდება
ქვეყანაში მელიორაციის განვითარების მიზნით, სარეაბილიტაციო პროექტები მიმდინარეობს, რომელთა ფარგლებშიც, მაგისტრალური არხები სრულად განახლდება და აღდგება.
როგორც „ბიზნესპარტნიორს“ გარემოს დაცვისა და სოფლის მეურნეობის მინისტრის მოადგილემ, გიორგი ხანიშვილმა განუცხადა, პროექტების ნაწილი დონორების დახმარებით ხორციელდება, უმეტესად კი მსოფლიო ბანკის ხელშეწყობით.
ხანიშვილის ინფორმაციით, ქვეყანაში წყლის დანაკარგების საკმაოდ მაღალი მაჩვენებელია, რასაც ის 90-იანი წლების მძიმე მემკვიდრეობას უკავშირებს.
„მაგისტრალური არხების განადგურება, შიდა გამანაწილებელი ქსელების მოშლა - ეს გამოწვევების მცირე ჩამონათვალია, რომელიც დღემდე პრობლემად რჩება. ამიტომაც, მელიორაციის ძირითადი კაპიტალური ხარჯები მიმართულია სწორედ იქითკენ, რომ ჩვენ აღვადგინოთ მაგისტრალური, მეორადი და მესამე გამანაწილებელი არხები. უნდა გაკეთდეს სწორედ ისეთი არხები, რომლებიც მოექცევა თანამედროვე ტექნოლოგიების ქვეშ და მაქსიმალურად შეამცირებს წყლის დანაკარგებს“, - აღნიშნა გიორგი ხანიშვილმა.
მისივე თქმით, გარემოს დაცვისა და სოფლის მეურნეობის სამინისტრო ამ კუთხით აქტიურად მუშაობს წლებია და რეგიონების მასშტაბით, სხვადასხვა პროექტს ახორციელებს.
„თქვენ იცით,რომ ჩვენ აქტიურად ვაფინანსებთ წვეთოვან სისტემებზე გადასვლას და ეს ყველა პროცესი ემსახურება იმას, რომ მაქსიმალურად ისეთი ძვირფასი რესურსი, როგორიც წყალია, მოხმარებული იქნეს ეფექტურად“, - განმარტა სოფლის მეურნეობის მინისტრის მოადგილემ.
გარემოს დაცვისა და სოფლის მეურნეობის სამინისტროში ამბობენ, რომ მიმდინარე წელს მელიორაციაში ჯამურად დაკონტრაქტებული ექნებათ 150 მილიონი ლარის პროექტები. თითოეული მათგანი კი მოემსახურება ერთის მხრივ წყალ უზრუნველყოფილი ფართობების გაზრდას ქვეყანაში, მეორეს მხრივ კი წყლის მიწოდების ხარისხობრივ გაუმჯობესებას.
