"წარმოებული პროდუქცია მნიშვნელოვანია, რომ საექსპორტო ბაზრების მოთხოვნის შესაბამისი იყოს"
"მნიშვნელოვანია, საექსპორტო ბაზრების მოთხოვნა გავითვალისწინოთ და მოთხოვნის შესაბამისად პროდუქცია ვაწარმოოთ,"-ამის შესახებ გადაცემა "ბიზნეს პოსტთან" საქართველოს გარემოს დაცვისა და სოფლის მეურნეობის სამინისტროს სოფლის მეურნეობისა და სოფლის განვითარების პოლიტიკის დეპარტამენტის ხელმძღვანელმა, ეკა ზვიადაძემ განაცხადა.
მისი ინფორმაციით, ბოლო 10 წლის განმავლობაში აგროსასურსათო პროდუქციის ექსპორტი მზარდია, რაც დაახლოებით 150%-იან ზრდას გულისხმობს. აღნიშნული მაჩვენებელი კი ისეთი პატარა ქვეყნისათვის, როგორიც საქართველოა, საკმაოდ კარგი მაჩვენებელია.
"ბაზარზე დივერსიფიცირებული პროდუქცია გვაქვს წარმოდგენილი და მოლოდინია, რომ მიმდინარე წელს მზარდი დინამიკა შენარჩუნდება. რაც შეეხება საექსპორტო პროდუქტებს, ექსპორტზე პირველ რიგში ღვინო, სპირტიანი სასმელები, მინერალური და მტკნარი წყალი, ასევე უალკოჰოლო, გაზიანი სასმელები გადის.
საქართველოში წარმოებული პროდუქციიდან კი ბაზარზე ყველაზე მოთხოვნადია ნედლი ხილი და ბოსტნეული, კურკოვანი, თესლოვანი ხილი, ციტრუსი და ასევე კენკროვანი ხილი, რომელმაც წარმოების რეკორდული მაჩვენებელი აჩვენა,"-აცხადებს ზვიადაძე.
როგორც სოფლის მეურნეობისა და სოფლის განვითარების პოლიტიკის დეპარტამენტის ხელმძღვანელი ვარაუდობს, სამომავლოდ მოცვის წარმოებაც გაიზრდება, ვინაიდან მაღალი მოთხოვნაა ახლო აღმოსავლეთის, გალფისა და ევროკავშირის ქვეყნებიდან.
ასევე მნიშვნელოვანია ის გარემოებაც,რომ თავისუფალი ვაჭრობის ხელშეკრულება რამდენიმე მეზობელ ქვეყანასთან არის გაფორმებული და ის პროდუქციის კონკურენტუნარიანობას ხელს უწყობს.
