"სნეილ ქეჩმა" ლოკოკინის ნახევარფაბრიკატების გაყიდვა დაიწყო

ქართულ-ნორვეგიულმა კომპანიამ „სნეილ ქეჩი“ (ნადი გრუპი) ლოკოკინის ნახევარფაბრიკატების რეალიზაცია დაიწყო. როგორც „ბიზნესპარტნიორს“ კომპანიის თანადამფუძნებელმა მერაბ ნადარაიამ განუცხადა, საწყის ეტაპზე, მათ მიერ წარმოებული პროდუქცია ზღვისპირა ქალაქების რესტორნებში შევიდა.

„სეზონურობიდან გამომდინარე, საზღვაო კურორტების კვების ობიექტებს ვამარაგებთ ჩვენი ნახევარფაბრიკატებით, აგვისტოს ბოლოდან კი - უკვე თბილისის რესტორნებშიც შევალთ. მოთხოვნა და დაინტერესება საკმაოდ დიდია, თუ გავითვალისწინებთ იმას, რომ რეალიზაცია ჯერ მხოლოდ 1 თვეა დავიწყეთ“, - აღნიშნა მერაბ ნადარაიამ.

რაც შეეხება ლოკოკინის ნახევარფაბრიკატების სუპერმარკეტებში გამოჩენის საკითხს, „სნეილ ქეჩის“ თანადამფუძნებელი ამბობს, რომ სავაჭრო ქსელებში აღნიშნული პროდუქცია სექტემბრიდან გაიყიდება.

მისივე ინფორმაციით, კომპანიამ ლოკოკინის ნახევარფაბრიკატები 3 სხვადასხვა რეცეპტით დაამზადა. „3 შეფუთვა გვაქვს, თითო შეფუთვაში 12 ცალი ლოკოკინა დევს. თითოეულის საბითუმო ფასი 12 ლარია“, - განმარტა „სნეილ ქეჩის“ თანადამფუძნებელმა.

ცნობისთვის, ლოკოკინების ნახევარფაბრიკატების ქარხანა სენაკის რაიონის სოფელ მენჯში მდებარეობს, სადაც კომპანია ამ ეტაპზე, წელიწადში 400 ტონა ლოკოკინას გადაამუშავებს. „სნეილ ქეჩმა“ ლოკოკინების ნახევარფაბრიკატების ქარხნის მშენებლობაში 2 მლნ ევროს ინვესტიცია განახორციელა. ქარხანა 1 800 კვადრატულ მეტრ ფართობზე აშენდა.