მეღვინე იაგო ბიტარიშვილი ახალ ვენახებს აშენებს
მეღვინე იაგო ბიტარიშვილი ახალ ვენახებს აშენებს. „იაგოს ღვინის“ დამფუძნებელი ამბობს, რომ ვენახების გაფართოების მიზანს, წარმოების გაზრდა წარმოადგენს.
„საერთაშორისო ბაზრებზე ჩვენს ღვინოზე დიდი მოთხოვნაა, მაგრამ ახალ საექსპორტო ბაზრებს ვეღარ ვამატებთ, რადგან არ გვაქვს საჭირო რაოდენობის ღვინო. სწორედ ამიტომ, დაწყებული მაქვს ახალი ვენახების გაშენების პროცესი. ახლა მიმდინარეობს საირიგაციო საკითხების მოწესრიგება. ახალი ვენახები არსებულ ვენახთან ახლოს გაშენდება“, - აღნიშნა იაგო ბიტარიშვილმა.
მეღვინეს თქმით, გარდა საექსპორტო ბაზრებისა, „იაგოს ღვინო“ 3-4 წელში ადგილობრივ ბაზარზეც გაიყიდება.
„ჩვენი ღვინო, როგორც იცით, 100%-ით საექსპორტოა და მსოფლიოს 11 ქვეყანაში იყიდება, ძირითადად, ევროკავშირის წევრ ქვეყნებსა და ასევე, აშშ-ში, სამხრეთ კორეასა და იაპონიაში. დიდი მოთხოვნაა წამოსული ჩინეთიდან და ტაივანიდანაც, ამიტომ, გვინდა რომ წარმოების გაზრდის შემდეგ, ამ ქვეყნებშიც შევიდეთ. ალბათ, 3-4 წელი დასჭირდება, სანამ ახალი ვენახებიდან საჭირო მოსავალს მივიღებთ. უკვე ამის შემდეგ, სიმბოლურად, ადგილობრივ ბაზარზეც გაიყიდება „იაგოს ღვინო“, - განმარტა ცნობილმა მეღვინემ.
მისივე ინფორმაციით, „იაგოს ღვინო“ ადრე ავსტრალიის და ახალი ზელანდიის ბაზარზეც იყიდებოდა, თუმცა, რაოდენობის სიმცირის გამო, აღნიშნულ ქვეყნებში, ამ ეტაპზე, ექსპორტი შეჩერებულია.
შეგახსენებთ, იაგო ბიტარიშვილს მცხეთის რაიონის სოფელ ჩარდახში აქვს ვენახი გაშენებული, რომელიც ბიომეურნეობას წარმოადგენს, რადგან ადგილზე ქიმიურ სასუქებს და შხამქიმიკატებს არ იყენებენ. "იაგოს მარანი" წელიწადში, დაახლოებით, 7000-8000 ბოთლ ღვინოს ასხამს, რომელსაც ტრადიციული ქართული წესით, ქვევრში აყენებს.
