მარნეულში სანერგე მეურნეობა "მზა ჩითილი" გაიხსნა

მარნეულში, სოფელ აზიზქედში, სანერგე მეურნეობა „მზა ჩითილი“ გაიხსნა.

"მზა ჩითილი" ბოსტნეულისა და ყვავილების ჩითილებს აწარმოებს. ბოლო პერიოდში, ადგილობრივი ფერმერების მხრიდან კენკროვანი კულტურების ნერგებზე გაზრდილი მოთხოვნის გამო, კომპანიამ USAID-ის სოფლის მეურნეობის პროგრამის ფინანსური მხარდაჭერით, კენკროვანი კულტურების ნერგების წარმოება დაიწყო. "მზა ჩითილი" უკვე ახორციელებს ჯიშების "მალგა" და "სკალა" გამრავლებას. უახლოეს პერიოდში დაინტერესებული ფერმერებისთვის დაახლოებით 250 ათასი ნერგი გახდება ხელმისაწვდომი. სერტიფიცირებულ, თანამედროვე და პროდუქტიულ ჯიშებზე წვდომის გაუმჯობესება USAID-ის სოფლის მეურნეობის პროგრამის ერთ–ერთი მთავარი მიზანია.

"მზა ჩითილი" სახელმწიფოს ფინანსური მხარდაჭერითაც სარგებლობს. „ერთიანი აგროპროექტის“ ფარგლებში, მეურნეობაში 2,8 მლნ ლარზე მეტი ინვესტიცია, აქედან 365 000 ლარი გრანტია, 1 მლნ ლარზე მეტი შეღავათიანი აგროკრედიტი.

მეურნეობა გარემოს დაცვისა და სოფლის მეურეობის მინისტრმა, ლევან დავითაშვილმა და აშშ-ის საერთაშორისო განვითარების სააგენტოს (USAID) მისიის დირექტორმა პიტერ ვიბლერმა გახსნეს. 

მინისტრი იმედოვნებს, რომ "მზა ჩითილი" ახალ სიტყვას იტყვის ქართული სოფლის მეურნეობის განვითარებაში.

"საქართველოში ბოსტნეული კულტურების მაღალხარისხიანი ჰიბრიდული ჩითილის წარმოება, ასევე კენკროვანი კულტურების, კერძოდ მარწყვის უკვე დაპატენტებული სახეობების შემოტანა განსაკუთრებით მნიშვნელოვანია დარგის განვითარებისთვის. სამინისტროს, USAID-ის, „საქპატენტისა“ და კერძო კომპანიის მჭიდრო თანამშრომლობის შედეგად, მნიშვნელოვანი ნაბიჯი გადაიდგა მეხილეობის დარგის განვითარების და კონკურენტუნარიანობის ზრდის მიმართულებით, რაც მომავალში დიდ შედეგებს მოგვცემს“, - განაცხადა მინისტრმა.

პიტერ ვიბლერმა აღნიშნა, უკვე მრავალი წელია USAID მხარს უჭერს საქართველოს სოფლის მეურნეობის დარგში თანამედროვე ტექნოლოგიების დანერგვა-განვითარების მიმართულებით, რაც ხელს შეუწყობს წარმოებული პროდუქციის ღირებულების და ფერმერების შემოსავლის ზრდას.