სოფლის მეურნეობა
29/09/2021
ლაურუსი: ადგილობრივ ბაზარზე დაფნაზე მოთხოვნა არ არის
დაფნის გადამამუშავებელი საწარმო შპს "ლაურუსის" დირექტორი ვანო ჯალაღონია „ბიზნესპარტნიორთან“ აცხადებს, რომ ადგილობრივ ბაზარზე დაფნაზე მოთხოვნა არ არის, შესაბამისად, კომპანიის წარმოებული და დაფასოებული დაფნა 100%-ით რუსეთში გადის.
მისი ინფორმაციით, კომპანია წელიწადში 200-250 ტონა დაფნის ფოთოლს ამზადებს, რაც სამომავლოდ იმის მიხედვით გაიზრდება, იქნება თუ არა შეკვეთები.
"ლაურუსი“ სენაკში, სოფელ ნოსირში მდებარეობს. კომპანიის 100%-იანი წილის მფლობელი რუსეთში მოღვაწე ბიზნესმენი შოთა წურწუმიაა, რომელიც რუსეთში ასევე კომპანია "ლაურუს სიბირს" ფლობს და მაღაზიებს სუნელ-სანელებლებითა და დაფნით ამარაგებს.
შპს "ლაურუსი" სენაკში, 2007 წელს დაფუძნდა. კომპანიამ პროექტში დაახლოებით 150 000 აშშ დოლარის ინვესტიცია განახორციელა.
