ქართული ღვინო COVID-ის წნეხში

ღვინის ექსპორტი პანდემიის გამო ჯამში 5-6%-ით, ღირებულება კი 12%-ით შემცირდა. როგორც ღვინის ეროვნული სააგენტოს ხელმძღვანელმა განაცხადა, კლების ტემპმა მეორე კვარტალში იმატა. ექსპორტი კი ძირითადად ჩინეთსა და რუსეთში შემცირდა.

„ექსპორტის კლება ფაქტიურად მთლიანად მოდის ამ ორ ქვეყანაზე. ჩინეთში ექსპორტი აპრილ-მაისში გაჩერებუყლი იყო. ახლა ჩინეთში ექსპორტის 30%-იანი კლებაა. რუსეთში კი 10-%-იანი. თუმცა ექსპორტის მაჩვენებლები სხვა ქვეყნების ხარჯზე ისე დაბალანსდა, რომ ჯამში რაოდენობის თვალსაზრისით ექსპორტის 5-6%-იანი კლებაა. მაგრამ აქ სამწუხარო ისაა რომ შემოსავლის თვალსაზრისით კლება უფრო მეტია, თითქმის 12%-იანი. მოგეხსენებათ, ყოველ წელს ქართული ღვინის ფასიც იზრდებოდა და ექსპორტის მაჩვენებლებიც, თუმცა ახლა ფასზეც დიდი წნეხია,“ - განაცხადა ლევან მეხუზლამ.

მისივე ინფორმაციით, ექსპორტის ტენდენციები ჩინეთისა და რუსეთის გარდა, სხვა ბაზრებზე დამაიმედებელია. „ამერიკის შეერთებუილ შტატებში შარშანდელის იდენტური ექსპორტია. მცირედი მატებაა დიდ ბრიტანეთში. აღმოსავლეთ ევროპის ქვეყნებში კი, სადაც ქართული ღვინო სუპერმარკეტებში იყიდება ექსპორტის მნიშვნელოვანი მატება ფიქსირდება,“ - აღნიშნა ლევან მეხუზლამ გადაცემაში „ბიზნესპარტნიორის ოთხეული“.