გლენბერი: ხონში ₾32 მლნ-იანი აგროკომპლექსის პროექტი ჩავარდა
გაყინული ხილ-ბოსტნეულის ექსპორტიორი კომპანია “გლენბერი“ ხონში სასათბურე და სამაცივრე-გადამამუშავებელ მეურნეობას აღარ გახსნის.
როგორც კომპანიის დამფუძნებელი რაფაელ მაღალაშვილი „ბიზნესპარტნიორთან“ აცხადებს, პროექტი, რომლის დაწყება დამოკიდებული იყო მთავრობის გადაწყვეტილებაზე კომპანიისთვის ხონში სასოფლო-სამეურნეო მიწების გადაცემაზე, ჩავარდა.
მისი განცხადებით, ხელისუფლებამ მიწების გადაცემაზე უარი თქვა, რადგან პროექტში კომპანიის პარტნიორი უცხოელი ინვესტორებიც უნდა ყოფილიყვნენ, მათზე მიწის გადაცემა კი კანონმდებლობით აკრძალულია.
„ამერიკელი ინვესტორები მყავდა, საბოლოოდ, მთავრობამ უარი გვიან თქვა, გაჭიანურდა პროცესები, რის ამერიკელებმაც აღარ მოინდომეს აღნიშნული ინვესტიციის განხორციელება,“ - აცხადებს მაღალალაშვილი.
„გლენბერის“ დამფუძნებელს სათბურებში ხილი და ბოსტნეული მოჰყავს. კომპანიას შეკვეთები აშშ-დან,ისრაელიდან, ინგლისიდან აქვს. დამკვეთები საქართველოდან ელოდებიან როგორც ბოსტნეულის, ისე გაყინული მარწყვის, ჟოლოსა და მაყვლის მიწოდებას.
გაყინული ხილ-ბოსტნეულის გადამამუშავებელი და შემნახველი საწარმო „გლენბერი” 2018 წელს გაიხსნა. კომპანიამ საწყის ეტაპზე 9 მილიონი ლარის ინვესტიცია განახორციელა. კომპანია შიდა ქართლში, ქარელში მდებარეობს, საწარმოში 250 კაცია დასაქმებული.
