გარჩეული თხილი 13.5-16 ლარი ღირს

თხილის მოსავლის აღების პროცესი დასასრულს მიუახლოვდა. საქართველოში 50 000 ჰექტარზე გაშენებული თხილის ბაღებიდან ფერმერები დაახლოებით 60 000 ტონა მოსავლის აღებას ელოდებიან. ეს რიცხვი გასული წლის მოსავლიანობას დაახლოებით 20-25%-ით აღემატება.

როგორც „ბიზნესპარტნორთან“ თხილის მწარმოებელთა ასოციაციის ხელმძღვანელი, გიორგი თოდუა განმარტავს, გაურჩეველი თხილის ფასი 3.5 ლარიდან 7.5 ლარამდე, გარჩეულის კი 13.5 ლარიდან 16 ლარამდე მერყეობს.

„განსხვავებული ხარისხის გამო, რა თქმა უნდა, ფასებიც განსხვავებულია. ნალექიანი ამინდების გამო, ფერმერების ნაწილს გაუჭირდა მოსავლის ოპერატიულად აღება. დღესაც მოვუწოდებთ ფერმერებს, რომ მოსავლის ოპერატიულად აღება აუცილებელია. ასევე აუცილებელია დროული შრობა და დასაწყობება. იმ შემთხვევაში თუ თხილის მოვლის ღირებულებათა ჯაჭვი დავარღვიეთ, შეიძლება უკუშედეგი მივიღოთ. ფერმერები, რომლებსაც ჩვენ ხუმრობით „ზარმაც ფერმერებს“ ვუწოდებთ, პირობას დებენ, რომ მომავალ წელს კიდევ უფრო მოინდომებენ, წამლობებსაც ჩაატარებენ და იმ რეკომენდაციებს გაითვალისწინებენ, რაც აუცილებელია იმისთვის, რომ მიიღონ მაქსიმალურად კარგი შედეგი“,- განაცხადა თოდუამ.