"ავთანდილის მეღვინეობა" 2024 წლიდან ექსპორტზე გასვლას გეგმავს

"ავთანდილის მეღვინეობა" 2024 წლის გაზაფხულზე ექსპორტზე გასვლას გეგმავს. საორიენტაციო  ბაზარი იტალიაა. 

როგორც მეღვინეობის დამფუძნებელმა, ავთანდილ ირომაშვილმა „ბიზნესპარტნიორთან” განაცხადა, მათი ორი სახეობის ღვინო, "წარაფი" და "გვიანი მოსავალი" იტალიის ღვინის მაღაზიებსა და ქსელურ მარკეტებში გაიყიდება.

ირომაშვილის ცნობით, კომპანია წელიწადში 3000-4000  ბოთლს აწარმოებს, რაც დაახლოებით 10-15 ტონა ყურძენის გადამუშავებას გულისხმობს.

იქიდან გამომდინარე, რომ კომპანიამ ადგილობრივი ბაზრის დაკმაყოფილებაც შეძლოს,საწყის ეტაპზე, ექსპორტზე წარმოებული პროდუქციის მხოლოდ 20%-ი გავა.

როგორც ირომაშვილი აცხადებს, მოლაპარაკებები მიმდინარეობს გერმანიასთანაც, სადაც სატესტო ნიმუშები უკვე გაგზავნილია. ირომაშვილის ვარაუდით, ოქტომბრის ბოლოს პასუხი ცნობილი იქნება.

"მიმდინარე წელს წარმადობის ზრდა დავიწყეთ და ვენახს ეტაპობრივად ვაშენებთ. გვინდა 100 ტონა ყურძნის გადამუშავებამდე მივიდეთ.

ამ ეტაპზე 5 სახის ღვინოს ვაწარმოებთ. ესენია, "წარაფი", "ქვევრის რქაწითელი", "საფერავი", "ქვევრის ალადასტური", "ალადასტური ნახევრად მშრალი როზე" და "გვიანი მოსავალი", რომელიც ბუნებრივად მაღალალკოჰოლური ტკბილი სასმელია,"-აცხადებს ირომაშვილი.

აღსანიშნავია, რომ მეღვინეობა პროდუქციის რეალიზაციას ადგილობრივ ბაზარზე ქსელური მაღაზიების საშუალებით ახდენს, თუმცა, სამომავლოდ, საკუთარი ღვინის ბარის გახსნას გეგმავს, რომელიც ამ ეტაპზე მხოლოდ იდეაა.

ცნობისათვის, "ავთანდილის მეღვინეობა" ბრენდად 2021 წელს იქცა. მეურნეობას ორ მიკროზონა და ერთი ადგილწარმოშობა აქვს, რაც საერთო ჯამში 3 ადგილწარმოშობის ღვინის წარმოებას გულისხმობს. ესენია, "ახოები", "საფერავი წარაფი" და "კარდანახი", რომელიც სოფელ კარდანახშია გაშენებული.