თენგიზ ცერცვაძე: Novavax-ი საუკეთესო ვაქცინა იქნება, ოღონდ აგვისტომდე დაცდა არ დაიწყოთ

თბილისის ინფექციური საავადმყოფოს ხელმძღვანელის თენგიზ ცერცვაძის განცხადებით, საქართველოში 1 მილიონი დოზა “ფაიზერის“ და 1 მილიონი დოზა “ნოვოვაქსის“ კოვიდვაქცინების შემოტანაზე კონტრაქტები უკვე ხელმოწერილია.

მისი შეფასებით, “ნოვოვაქსი“ გრიპის ვაქცინის ანალოგია, რომელიც გვერდითი მოვლენებისგან თავისუფალია. თუმცა, თენგიზ ცერცვაძე მოსახლეობას ურჩევს, რომ ამ ვაქცინას არ დაელოდონ, რადგან ის ქვეყანაში ივლის-აგვისტოში შემოვა. ვაქცინაციის ტემპი კი, პირიქით, უნდა დაჩქარდეს, რადგან ეპიდემია დასრულდეს.

“ჩემი, როგორც 1 ექიმის თვალსაზრისით, “ნოვოვაქსი“ მსოფლიოში ყველაზე უკეთესი ვაქცინა იქნება. ოღონდ არ დაიწყოთ ახლა დაცდა, რადგან ის იქნება ივლის-აგვისტოში. ეპიდემია წელში უნდა გადავტეხოთ და წლის ბოლომდე მთელი მოსახლეობა ავცრათ. “ნოვოვაქსი“ მოგვისწრებს. მეტსაც გეტყვით, ზოგიერთს, ვინც “ასტრაზენეკათია“ აცრილი, 6 თვე გავა და ხელმეორედ მოუწევს აცრა.

“ნოვოვაქსი“ შუალედური ტექნოლოგიით არის დამზადებული, ეს არის ძველ ტრადიციულსა და ახალს შორის. გასუფთავებული ცილებია, რომელიც პრაქტიკულად თავისუფალია გვერდითი მოვლენებისგან. ის არ არის დნმ“,- აღნიშნა თენგიზ ცერცვაძემ.

რაც შეეხება ვაქცინაციის პროცესს, თენგიზ ცერცვაძის თქმით, ბოლო დროს ტემპმა მოიმატა, თუმცა საკმარისი არ არის და ის უნდა გასამმაგდეს. დღეში 5000-დან 6000-მდე ადამიანი უნდა იცრებოდეს, რომ ქვეყანამ ისრაელის მსგავსად დაიწყოს შეზღუდვების მოხსნა, რომელმაც მოსახლეობის დიდი ნაწილი უკვე აცრა.