თბილისი ენერჯი: მომხმარებლებს ის გადასახადი მიუვიდათ, რა ოდენობის გაზიც მოიხმარეს
2022 წლის განმავლობაში გაზის დანადგარებისგან გამოწვეული უბედური შემთხვევების შედეგად თბილისში 12 ადამიანი გარდაიცვალა, 65 ადამიანმა კი ძლიერი ინტოქსიკაცია მიიღო. ჯამში, გასულ წელს, დედაქალაქსა და მის შემოგარენში, თითქმის 343 ათასი აბონენტი შემოწმდა, რის შედეგადაც 14 ათასზე მეტი აბონენტი ჩაიჭრა, რომელიც ყოველდღიური საფრთხის ქვეშ იყო. ასეთია ოფიციალური სტატისტიკა, რომელიც გაზგამანაწილებელმა კომპანია „თბილისი ენერჯიმ“ დღეს წარადგინა.
როგორც „თბილისი ენერჯის“ ტექნიკური დირექტორის მოადგილე გიორგი ლეფსვერიძე აცხადებს, წინა წლებთან შედარებით, დარღვევების სტატისტიკა მნიშვნელოვნად არის შემცირებული და კლება ფიქრსირდება როგორც ინტოქსიკაციის, ისე გარდაცვალების მაჩვენებლებში.
გიორგი ლეფსვერიძე გაზის ხარისხზეც ამახვილებს ყურადღებას და ამბობს, რომ დედაქალაქში გაზის ხარისხი სტანდარტებს შეესაბამება და ის მუდმივად მოწმდება გაზის ტრანსპორტირების კომპანის მიერ.
„რაც შეეხება მომხმარებლების პრეტენზიებს ზამთრის თვეებში მისულ გაზის გაზრდილ გადასახადთან დაკავშირებით, ზამთრის სეზონის დადგომასთან ერთად, ქვეყანაში გაზის მოხმარება მუდმივად იზრდება და მომხმარებლებს ის გადასახადი მიუვიდათ, რა რაოდენობის გაზიც მოიხმარეს“, - განმარტავს „თბილისი ენერჯის“ ტექნიკური დირექტორის მოადგილე.
