თამარ გაბუნია: ვიდრე მოთხოვნა მიწოდებას აჭარბებს, ვაქცინირებულთათვის ბენეფიტები დისკრიმინაციული იქნება
ჯანდაცვის მინისტრის მოადგილის თამარ გაბუნიას განცხადებით, ამ ეტაპზე ქვეყანაში ვაქცინაზე მოთხოვნა მიწოდებას აჭარბებს. შესაბამისად, ვაქცინირებული ადამიანებისთვის პრივილეგიების მინიჭება დისკრიმინაციული ხასიათის იქნება.
“ძალიან კარგია, რომ აცრის პროცესი აქტიურად მიმდინარეობს. დღეს მოთხოვნა იმდენად მაღალია, რომ მიწოდება შედარებით ჩამორჩება. ამ შემთხვევაში ის, რომ აცრილ ადამიანს შეიძლება ჰქონდეს მეტი თავისუფლება, ეს გარკვეულწილად დისკრიმინაციული ხასიათის იქნება. ეს მოდელი ბევრმა გამოიყენა და ჩვენთანაც შესაძლებელია ამაზე ვიფიქროთ, მაგრამ მაინც ვფიქრობ, ქვეყანაში აცრილი ადამიანების გარკვეული რაოდენობა მაინც უნდა შეგროვდეს. მნიშვნელოვანია ბენეფიტი არ იყოს დისკრიმინაციული ხასიათის. ვიდრე მოთხოვნა არ იქნება სრულად დაკმაყოფილებული და ვაქცინების რაოდენობა არ იქნება ქვეყანაში იმდენი, რომ ყველა მსურველს ჰქონდეს მისი დროულად მიღების შესაძლებლობა, მანამდე ამ ტიპის ბენეფიტების დაწესებას შესაძლოა ჰქონდეს დისკრიმინაციული ხასიათი“,- განაცხადა თამარ გაბუნიამ.
მისი თქმით, მასიური ვაქცინაციის კამპანია ივლისში დაიწყება. ამ ეტაპზე მასიური ვაქცინაციის ცენტრების მომზადება მიმდინარეობს, რადგან ის კლინიკური ინფრასტრუქტურა, სადაც დღეს მიმდინარეობს ვაქცინაცია, საკმარისი არ იქნება.
“გეგმის თანახმად, ვაქცინაციის მასიური კამპანია დაგეგმილია მესამე კვარტალში, ივლისში ჩვენ ვფიქრობთ, მეტად გაიშლება ვაქცინაციის პროცესი. ივლისი, აგვისტო, სექტემბერში იქნება ძალიან ფართო მოცვა. შემდეგ უკვე მეოთხე კვარტალი იქნება ის პერიოდი, როდესაც სრულად უნდა მოვიცვათ მოსახლეობა“,- განაცხადა თამარ გაბუნიამ.
