თამარ გაბუნია: მძიმე ეპიდსიტუაციაა, ბავშვებში ინფექციის გავრცელების მაღალი მაჩვენებელია

ჯანდაცვის მინისტრის მოადგილის თამარ გაბუნიას შეფასებით, ქვეყანაში მძიმე ეპიდსიტუაციაა. ინფექციის გავრცელების მაღალი მაჩვენებელია ბავშვებში, რის გამოც პედიატრიული საწოლების დამატების საჭიროება გახდა. 

“პანდემიის დღევანდელი სიტუაცია ძალიან მძიმეა და აყენებს განსაკუთრებულ რისკებს მოსახლეობის ჯანმრთელობის, ზოგადად საზოგადოების სოციალური და ნებისმიერი სხვა პროცესების განვითარების კუთხით. გუშინდელი შემთხვევების რაოდენობა აღემატება 1800-ს. ეს ჯამური მაჩვენებელია, თუმცა მაინც მიუთითებს ბოლო 2 კვირის განმავლობაში შემთხვევების განსაკუთრებით გააქტიურებას.

გასული 2-3 დღის მანძილზე ჩვენ მოგვიწია პედიატრიული საწოლების დამატებით მობილიზება, რაც მიუთითებს ბავშვებში ინფექციის გავრცელების მაღალ მაჩვენებელს. თბილისში მობილიზებული 200-მდე პედიატრიული საწოლი, რომელიც ეპიდემიის მესამე ტალღის პირობებში პრაქტიკულად დაუტვირთავი იყო, უკვე გადატვირთულია და ჩვენ მოგვიწია უკვე დამატებით საწოლების მობილიზება პედიატრიული პაციენტებისთვის, რაც ნიშნავს იმას, რომ ინფექციის გავრცელების კუთხით რისკები იზრდება და ამ შემთხვევაში მთავარი გადაწყვეტა ისევ და ისევ არის, ვაქცინაციის პროგრამა, მიუხედავად ყველაფრისა, ზოგადად დაძაბული საზოგადოებრივი ფონისა ქვეყანაში, ამ შემთხვევაში ყველას ინტერესია, ვაქცინაციის პროგრამა განხორციელდეს შეფერხების გარეშე“,- აღნიშნა თამარ გაბუნიამ. 

მისი თქმით, დღეს ქვეყანაში მობილიზებულია 1 მილიონი დოზა “სინოფარმის“ და “სინოვაკის“ ვაქცინა, რომლის ეფექტურობაც ძალიან მაღალია ჰოსპიტალიზაციის და ლეტალობის თავიდან აცილების კუთხით.