თამარ გაბუნია: კოვიდვაქცინა საქართველოში 22 მარტის კვირაში ჩამოვა

ჯანდაცვის მინისტრის მოადგილის თამარ გაბუნიას განცხადებით, წინასწარი ინფორმაციით, საქართველოში კორონავირუსის საწინააღმდეგო ვაქცინა 22 მარტის შემდეგ შემოვა. კოვიდვაქცინაცია კი, მარტის ბოლოს დაიწყება.

მისი თქმით, პირველ ეტაპზე საქართველოში „ფაიზერის“ ვაქცინა შემოვა. „ასტრაზენეკას“ ვაქცინას კი, მაისის ბოლომდე ქვეყანა ეტაპობრივად მიიღებს.

„დღეს სატელეფონო კონსულტაცია შედგა „ფაიზერის“ სათაო ოფისთან. ასევე „კოვაქსის“ წარმომადგენლებთან.

წინასწარი ინფორმაციით, ვაქცინის მოწოდება მოხდება 22 მარტის კვირაში. მარტის ბოლომდე კი, „ფაიზერის“ მიმართულებით ვაქცინაციის პროგრამა დაიწყება.

ასევე გვაქვს სიახლეები „ასტრაზენეკას“ ვაქცინის მოწოდებასთან დაკავშირებით. იუნისეფმა უკვე მიიღო დასტური „ასტრაზენეკასგან“ პირველი დოზების მოწოდებაზე, ანუ 129 600 დოზა მაისის ბოლომდე უნდა მივიღოთ. პირველი ნაწილი მარტის ბოლომდე ჩამოვა“,- აღნიშნა თამარ გაბუნიამ.