თამარ გაბუნია: დღეში 17 000 ვაქცინაციის ჩატარების შესაძლებლობა გვაქვს
ჯანდაცვის სამინისტროს 2.5 მილიონი დოზა ვაქცინის საქართველოში შემოტანაზე კონტრაქტები უკვე გაფორმებული აქვს. ვაქცინის მოწოდება რამდენიმე დღეში დაიწყება. ივლისის ბოლომდე კი, ქვეყანაში მილიონზე მეტი ვაქცინა იქნება შემოსული. ამის შესახებ ჯანდაცვის მინისტრის მოადგილემ თამარ გაბუნიამ ისაუბრა.
მისი თქმით, ქვეყანაში ვაქცინაციის 284 ბრიგადაა მობილიზებული, 1 ბრიგადის შესაძლებლობაა დღეში 60 აცრის ჩატარება. დღიურად, ჯამში 17 000 ვაქცინაციის ჩატარებაა შესაძლებელი.
მინისტრის მოადგილის ინფორმაციით, საქართველოს მასშტაბით ბრიგადების რაოდენობის გაორმაგება იგეგმება.
“გააქტიურდება ვაქცინაციის ცენტრები. უკვე მოქმედებს “ჰუალინგის“ ვაქცინაციის ცენტრი. ასევე კონსულტაციები მიმდინარეობს დიდ მოლებთან, სადაც ჯანდაცვის სამინისტრო და პროცესში ჩართული კლინიკები გამართავენ ვაქცინაციის ცენტრებს, იმისთვის, რომ ჩვენ თვეში სულმცირე 1 მილიონი მოქალაქის ვაქცინაცია მოვახერხოთ და დროზე მივიღოთ კარგი მოცვა მეოთხე ტალღის თავიდან აცილებისთვის“, - განაცხადა თამარ გაბუნიამ საკოორდინაციო საბჭოს სხდომის დასრულების შემდეგ.
