სნეპ ფიტნესი: კომენდანტის საათის გადაწევის შემდეგ მომხმარებელთა რაოდენობა 20%-ით გაგვეზარდა

პანდემიის პირობებში დაწესებული შეზღუდვების შემსუბუქებამ, კერძოდ კომენდანტის საათის შემცირებამ “სნეპ ფიტნესს“ მომხმარებლები 20%-ით გაუზარდა.

ამასთან, როგორც “სნეპ ფიტნესის“ ქსელის დირექტორი სოფო სოლოღაშვილი “ბიზნესპარტნიორთან“ აცხადებს, ადრინდელთან შედარებით ხალხი აქტიურად ვარჯიშობს. აბონემენტს ვინც ყიდულობს დარბაზში თითქმის ყველა დადის, როცა ადრე აბონემენტის მფლობელთა 30% არ ვარჯიშობდა.

“მომართვიანობა მაღალია. მას შემდეგ რაც, კომენდანტის საათმა 23:00 საათამდე გადაიწია, ხალხის რაოდენობამ დაახლოებით 20%-ით მოიმატა, რაც საკმაოდ კარგი ციფრია.  

ამასთან, ვამჩნევ, რომ ახალი ტრენდია. ადრე ძალიან ბევრი ადამიანი ყიდულობდა აბონემენტს და იქიდან 30% არ დადიოდა. ახლა ვინც ყიდულობს, ძირითადი ნაწილი, 90% დადის და ვარჯიშობს“,- აღნიშნა სოფო სოლოღაშვილმა.

მისი თქმით, დარბაზები კონკრეტულ დროს და დღეებში აღარ არის გადატვირთული. ნებისმიერ დროს ხალხის საშუალო დონის აქტივობაა.

“რაც 24 საათიანი არ ვართ და კონკრეტულ საათზე იკეტება, უფრო გადანაწილდა მომხმარებელთა რაოდენობა. ადრე თუ დარბაზში ხალხის დიდი რაოდენობა მხოლოდ დილის და საღამოს საათებში გვხვდებოდა, ახლა ნებისმიერ დროს საშუალო დონის აქტივობაა. რაღაც პერიოდში დარბაზები ცარიელი აღარ არის. შაბათ-კვირასაც არ დადიოდნენ და ორშაბათიდან იწყებოდა “საგიჟეთი“. ისე მოხდა, კონკრეტულ დღეებში კი არ არის ბუმი, შაბათ-კვირასაც დადიან. არ ვიცი, რეალურად რა არის ამის მიზეზი, მაგრამ ფაქტია, ასეა“, - განაცხადა სოფო სოლოღაშვილმა.

„სნეფ ფიტნესს“ საქართველოს მასშტაბით ამ დროისთვის 4 ფილიალი აქვს.