შენობები ექსპლუატაციაში შესვლამდე ელექტროენერგიით და ბუნებრივი აირით ვერ მომარაგდებიან
ექსპლუატაციაში მიღებამდე შენობა-ნაგებობების ელექტროენერგიით და ბუნებრივი აირით მომარაგება აიკრძალება. ამის შესახებ თბილისის მერმა კახა კალაძემ დედაქალაქის მთავრობის სხდომაზე განაცხადა. საკანონმდებლო ინიციატივა პარლამენტს უკვე გადაეგზავნა.
„2009 წელს შეტანილი ცვლილებებიდან გამომდინარე, დაშვებულია შენობა-ნაგებობების გამოყენება და მასში ცხოვრება მის ექსპლუატაციაში მიღებამდე. ექსპლუატაციაში მიღება ნიშნავს შენობა ნაგეობის სამშენებლო ნებართვასთან და პროექტთან შესაბამისობაში დადგენას. დღეს არსებული საკანონმდებლო პრაქტიკიდან გამომდინარე, ადამიანები ცხოვრობენ ისეთ შენობა-ნაგებობებში, რომელიც ჯერ კიდევ არ არის ექსპლუატაციაში მიღებული. აწარმოებენ სარემონტო სამუშაოებს. იმისთვის, რომ შეიცვალოს ეს დამკვიდრებული პრაქტიკა და თავად სამშენებლო კომპანიებს ჰქონდეთ ინტერესი, აწარმოონ მშენებლობა სამშენებლო ნორმებისა და მშენებლობის ნებართვის შესაბამისად და შენობა შევიდეს ექსპლუატაციაში, კანონში ცვლილება ითვალისწინებს, ჯერ კიდევ ექსპლუატაციაში მიუღებელი შენობა-ნაგებობის ელექტროენერგიითა და ბუნებრივი გაზით მომარაგების აკრძალვას“,- აღნიშნა კახა კალაძემ.
მისი თქმით, არის შემთხვევები, როდესაც მშენებელი ახერხებს დასრულებული შენობის რეალიზაციას და ექსპლუატაციაში შესვლას აღარ ჩქარობს.
„ზოგიერთ შემთხვევაში მშენებელი თავის შემოსავალს მიიღებს და საერთოდ არ აინტერესებს ეს კონკრეტული კორპუსი შევა ექსპლუატაციაში თუ არა. შემდეგ იქ მცხოვრები ადამიანები დარბიან აქეთ-იქით, რათა საცხოვრებელი კორპუსი რაც შეიძლება სწრაფად შევიდეს ექსპლუატაციაში, რაც ვფიქრობ, არასწორია“,- განაცხადა კახა კალაძემ.
