“სასურველია, შემოდგომას უსაფრთხო სკოლებით, ბაღებით, უნივერსიტეტებით, ბანკებით შევხვდეთ“ 

დაავადებათა კონტროლის ეროვნული ცენტრის ხელმძღვანელი ამირან გამყრელიძე სკოლების მასწავლებლებს, ბაღების აღმზრდელებს, უნივერსიტეტების სტუდენტებსა და ლექტორებს, ბანკების თანამშრომლებს, ფარმაცევტული სექტორის წარმომადგენლებს და სხვა საჯარო სექტორში მომუშავეებს მიმართავს, რომ შემოდგომამდე ორჯერადად აიცრან. 

“დღეს ძალიან კარგი ინიციატივით გამოვიდა სამედიცინო უნივერსიტეტი “ალმა მატერი“, რომელმაც დაანონსა, რომ სტუდენტები და პროფესორ-მასწავლებლები შემოდგომისთვის იქნებიან აცრილები, ეს სხვა უნივესრიტეტებსაც მოუწოდა.

ქვეყანაში 100 000-ზე მეტი სტუდენტია, იგივე ჩვენი სტუდენტები, რომ მიდიან უცხოეთში, ყველას სთხოვენ, რომ ორჯერ აცრილები უნდა იყვნენ. სასურველია შემოდგომას ჩვენ შევხვდეთ ე.წ. უსაფრთხო უნივერსიტეტებით, სკოლებით, ბაღებით, რაც ნიშნავს, რომ ბაღის ყველა აღმზრდელი, სკოლის ყველა მასწავლებელი, უნივერსიტეტის ყველა სტუდენტი და ლექტორი იყოს ორჯერადად აცრილი. აგრეთვე საბანკო სექტორმა უნდა გამოიჩინოს აქტიურობა, ფარმაცევტული სექტორიც ერთ-ერთი დიდი დამსაქმებელია“,- განაცხადა ამირან გამყრელიძემ. 

მისი ინფორმაციით, დაავადებათა კონტროლის ცენტრში 61%-ია აცრილი. 10%-დან 15%-მდე ვირუსი აქვს გადატანილი და ჯერ 120 დღე არ არის გასული, რომ მათ ვაქცინაცია ჩაიტარონ. 

ამირან გამყრელიძის განცხადებით, NCDC-ის მიზანია, აგვისტომდე თანამშრომლების 100% აიცრას. 

“აუცილებელია სამედიცინო დაწესებულებაში ყველა იყოს აცრილი, რადგან გვქონდეს უსაფრთხო ჰოსპიტლები, სამედიცინო დაწესებულებები“,- აღნიშნა ამირან გამყრელიძემ. 

მისი თქმით, როდესაც ივნისში ვაქცინაზე მიწოდებას მოთხოვნა სჭარბობდა, ახლა პირიქით არის.