საქართველოში Sinovac-ით ვაქცინაცია შესაძლოა, მაისის შუა რიცხვებიდან დაიწყოს
იმუნიზაციის და ვაქცინაციის გაფართოებული საბჭო მთავრობასთან საქართველოში ჩინური წარმოების ვაქცინის “სინოვაკის“ გამოყენების საკითხს განიხილავს. საუბარია “სინოვაკის“ გამოყენებაზე, სანამ ის ჯანმოს ავტორიზაციას მიიღებს.
ჯანდაცვის მინისტრის მოადგილის თამარ გაბუნიას განცხადებით, ჯანმოს “სინოვაკთან“ დაკავშირებით საბოლოო გადაწყვეტილება ჯერ არ მიუღია, თუმცა არსებობს სტრატეგიული ექსპერტების ჯგუფის შუალედური, დადებითი დასკვნა აღნიშნული ვაქცინის შედეგების შესახებ.
“ამ დასკვნის საფუძველზე, იქიდან გამომდინარე, რომ საჭიროება მაღალია, იმუნიზაციის საბჭომ და ასევე ვაქცინაციის გაფართოებულმა საბჭომ მხარი დაუჭირა მთავრობასთან ამ საკითხის განხილვას, “სინოვაკის“ შედარებით ადრეული გამოყენების თაობაზე, ვიდრე ჯანმოს ავტორიზაცია დასრულდება“, - აღნიშნა თამარ გაბუნიამ.
მისი თქმით, ჯანმოს მიერ “სინოვაკისთვის“ ავტორიზაციის მინიჭების საკითხი მიმდინარე პროცესია. თუმცა, თუ პროცესი მაისის ბოლომდე არ დასრულდება, ეპიდემიური ვითარებიდან, აგრეთვე ვაქცინაციის საჭიროებიდან გამომდინარე, საქართველოში “სინოვაკის“ გამოყენება შესაძლოა, ავტორიზაციის მინიჭებამდე, მაისის შუა რიცხვებიდან დაიწყოს.
ინფორმაციისთვის, საქართველომ “სინოვაკის“ ვაქცინის დოზები ჩინეთისგან საჩუქრად მიიღო.
