საჯარო ბაღები აღსაზრდელებს 1-ელი ოქტომბრიდან მიიღებს
საჯარო ბაგა-ბაღებში სააღმზრდელო პროცესი 1-ელი ოქტომბრიდან განახლდება, - გადაწყვეტილება უწყებათაშორისი საკოორდინაციო საბჭოს სხდომაზე მიიღეს.
კახა კალაძემ მოადგილეს, ილია ელოშვილს დაავალა, რომ საბავშვო ბაგა-ბაღებში სააღმზრდელო პროცესის განახლებამდე, პროდუქტების დარიგების სოციალური პროექტი გაგრძელდეს.
„სანამ ბაღები ფუნქციონირებას დაიწყებს, მინდა ჩემს მოადგილე ილია ელოშვილს დავავალო, 15 სექტემბრიდან პირველ ოქტომბრამდე მოახდინოთ საკვებით უზრუნველყოფა, როგორც ეს პანდემიის პირობებში გვქონდა. მაქსიმალურად გქონდეთ კომუნიკაცია მშობლებთან და უზრუნველყავით, რომ რაციონი, რაც ბაღის აღსაზრდელებს ამ ორი კვირის განმავლობაში უნდა მიეღოთ, დაფასოებული პროდუქტის სახით, სახლში წაიღონ“, - აღნიშნა თბილისის მერმა.
მერმა მოადგილეებს, საქალაქო სამსახურების უფროსებს და გამგებლებს კიდევ ერთხელ დაავალა, რომ ის თანამშრომლები, რომლებსაც დისტანციურად მუშაობა შეუძლიათ, ამავე რეჟიმში დატოვონ.
