რეგულირების სააგენტო: წამლის ეროვნული ლაბორატორიის შექმნაზე მუშაობა დაწყებულია
წამლის ეროვნული ლაბორატორიის შექმნის პროცესი უკვე დაწყებულია. ფარმაცევტული და სამედიცინო საქმიანობის რეგულირების სააგენტოს ხელმძღვანელი ზაალ კაპანაძე “ბიზნესპარტნიორთან“ აცხადებს, რომ მიმდინარეობს მოსამზადებელი სამუშაოები, საუბარია სივრცის ნახვაზე, სადაც ლაბორატორია მოეწყობა. შემდგომი ნაბიჯები დაკავშირებულია პროექტირებასთან, შესაბამის აღჭურვასთან.
“რა თანხა დაიხარჯება, წინასწარ ამის თქმა არ შეგვიძლია. როდესაც უკვე სრული პროდუქტი გვექნება, ლაბორატორიის სახით, შემდეგ შეიძლება ამაზე საუბარი. ეს დამოკიდებულია ზოგადად იმ აღჭურვის ელემენტზე, რასაც გამოვიყენებთ - ტექნიკა, რომელიც წამლის ხარისხის ანალიზისთვის იქნება განკუთვნილი, ამ ტექნიკის მოცულობაზე. სხვადასხვა მწარმოებელს სხვადასხვა ფასი და პირობა აქვს. ჯერ არ არის კონკრეტული აღჭურვის ნაწილი შერჩეული. რაც შეეხება დაფინანსების წყაროს, აღჭურვის პროგრამაში გარკვეული თანხებია გათვალისწინებული, თუმცა პარალელურად დონორებთანაც მიდის მუშაობა, რათა საბოლოო ჯამში მივიღოთ სრულყოფილი, კარგი ლაბორატორია“, - აღნიშნა ზაალ კაპანაძემ.
მისი თქმით, ამ ეტაპზე საქართველოში მედიკამენტის რეგისტრაციის ორი მექანიზმი არსებობს, აღიარებითი და ეროვნული.
“ორ მექანიზმს შორის განსხვავებაა დრო და შესაბამისი დოკუმენტების მოცულობა. საბოლოო ჯამში, ორივე შემთხვევაში მედიკამენტის რეგისტრაცია ხდება იმ დოკუმენტალურ მასალაზე დაყრდნობით, რომელსაც მარეგისტრირებელი, ანუ იურიდიული პირი წარმოადგენს და ეს მოიცავს უამრავ დოკუმენტს, რაც არის თვითონ მწარმოებლის მიერ ხარისხის სერტიფიკატი, წინასწარი კვლევის მონაცემები და სხვადასხვა ტიპის დოკუმენტაცია, რომელიც საბოლოო ჯამში იძლევა წამლის რეგისტრაციისა და მისი ბაზარზე დაშვების საფუძველს.
აღიარებითი რეჟიმის განსხვავება ის არის, რომ სახელმწიფომ განსაზღვრა მკაცრი მარეგულირებლები, ესენი ძირითადად არიან ევროპის ქვეყნები და რამდენიმე არაევროპული ქვეყანა - აშშ, იაპონია, სამხრეთ კორეა, ახალი ზელანდია, ისრაელი, ანუ ისეთი ქვეყნები, რომლებსაც მკაცრი მარეგულირებლები ჰყავსდა ამ ქვეყნებში აღიარებული წამლები დაშვებულია. შესაბამისად მათი ბაზარზე დაშვება ხდება ჩვეულებრივად რეგისტრაციით, უბრალოდ ისინი გადიან უფრო შედარებით მცირე დროიან პროცედურას და დოკუმენტაცია, რომელიც არის წარმოსადგენი, უფრო ნაკლები მოცულობისაა.
რაც შეეხება ეროვნული რეჟიმის რეგისტრაციას, აქაც დოკუმენტური რეჟიმი გვაქვს, თუმცა მისი მოცულობა უფრო მეტია, დარეგისტრირების დრო კი, 5 თვემდეა. აქ უბრალოდ ბევრი დოკუმენტის გადამოწმება ხდება თვითონ ადგილობრივ მარეგულირებელთან უშუალო კომუნიკაციით, სხვა მსგავსი მექანიზმებით, რითაც შემდგომ თუ ის აკმაყოფილებს მოთხოვნას, მედიკამენტი ბაზარზე დაიშვება. ამის შემდეგ უკვე წამალი ლეგალურიგზით შესაძლებელია მოხვდეს ქვეყნის ბაზარზე. ასე, რომ ის გადის საკმაოდ წონად ფილტრს იმისათვის, რომ დაშვებული იყოს ბაზარზე ესა თუ ის მედიკამენტი“, - განაცხადა ზაალ კაპანაძემ.
ინფორმაციისთვის, მედიკამენტების ხარისხის კონტროლის მიზნით, წამლის ეროვნული ლაბორატორიის შექმნის შესახებ გუშინ ჯანდაცვის მინისტრმა ეკატერინე ტიკარაძემ პარლამენტში “მინისტრის საათის“ ფორმატში ისაუბრა.
მინისტრის თქმით, ლაბორატორია შეისწავლის როგორც ადგილობრივ, ასევე იმპორტირებული მედიკამენტების ხარისხს.
