რას აკეთებს მთავრობა უკრაინელი დევნილების დასახმარებლად - მინისტრის განმარტება

ეკონომიკის მინისტრის განცხადებით, საქართველო უკრაინელ დევნილებს თავშესაფრის გარდა ქვეყანაში ღირსეული ცხოვრების შესაძლებლობასაც აძლევს.

ლევან დავითაშვილი განმარტავს, რომ ბოლო მონაცემებით, საქართველოში მყოფი უკრაინელი დევნილების რიცხვი 20 000-ს აღწევს. 

"ჩვენთან რამდენიმე ათეული ათასი უკრაინელია. დაახლოებით 20 000-მდე მოქალაქეზე განაცხადა საელჩომ. ფიქსირდება შემოსვლებიც და გასვლებიც. უნდა ველოდოთ, რომ ეს რიცხვი 20 000-მდე დარჩება. ძირითადად ორი ტიპის დაფინანსება გვაქვს. ეს არის სახელმწიფო და მუნიციპალიტეტის ბიუჯეტი და მეორე, კერძო სექტორის დონაცია. ალბათ, დონორების დახმარებებიც არის. რთულია, რომ კონკრეტული რიცხვები გითხრათ. ეს ყველაფერი დაკორექტირდება. 

ჩვენ დავიწყეთ პროგრამა იმ ტურისტებისთვის, ვინც ვერ შეძლეს უკრაინაში დაბრუნება. ანაზღაურდა მათი საცხოვრებელი ხარჯები. ასევე იყო გარკვეული შეთავაზებები, რომელიც უკავშირდებოდა მუნიციპალურ სერვისებს. შემდეგ, განათლების სამინისტრომ დაიწყო მოსწავლე ახალგაზრდების დაფინანსება და გაჩნდა მათთვის სწავლის შესაძლებლობა. გვინდა, რომ ამ ადამიანებს არა მხოლოდ თავშესაფარი მივცეთ, არამედ მათი სოციალური დაცვის კუთხითაც ღირსეული პირობები შევქმნათ. გვირჩევნია ბევრი ვაკეთოთ და ნაკლები ვილაპარაკოთ",- განაცხადა დავითაშვილმა.