რა რაოდენობის ვაქცინების მიღების პერსპექტივა აქვს საქართველოს- ამირან გამყრელიძის განმარტება

ჯანდაცვის სისტემა ზაფხულში მოსახლეობის მასობრივ იმუნიზაციას გეგმავს, რაც ნიშნავს დღეში 10 000-დან 15 000-მდე ადამიანის აცრას.

დაავადებათა კონტროლის ეროვნული ცენტრის ხელმძღვანელის ამირან გამყრელიძის ინფორმაციით, საქართველო 15 ივნისამდე “კოვაქს პლატფორმის“ ფარგლებში “ასტრაზენეკას“ დაახლოებით 43 000 დოზა ვაქცინას ელოდება. აგრეთვე, ივნისის ბოლოს ან მაქსიმუმ ივლისის დასაწყისში ქვეყანაში 0.5 მილიონი “სინოფარმის“ ვაქცინა შემოვა.

“მესამე კვარტალში კი, ქვეყანაში თანდათან “ფაიზერის“ 1 მილიონი დოზა შემოვა. ამაზე კონტრაქტი დასრულების პირას არის. გარდა ამისა მოლაპარაკებები მიმდინარეობს “სინოვაკთან“, “ნოვოვაქსთან“.

ჩვენ ასეთი გაანგარიშება გვაქვს, რომ ყველა თვის დასაწყისში ვაქცინის დაახლოებით ნახევარი მილიონი მარაგი გვქონდეს და მასობრივ იმუნიზაციაზე წავიდეთ“, - აღნიშნა ამირან გამყრელიძემ.