პროფესიული კვალიფიკაციების შემუშავებისა და განვითარების მეთოდოლოგია დამტკიცდა
კადრის მომზადებისა და შრომის ბაზრის დაკმაყოფილების მიზნით, პროფესიული კვალიფიკაციების შემუშავებისა და განვითარების მეთოდოლოგია დამტკიცდა.
როგორც "ჯიაიეტის" პროფესიული განათლების ექსპერტი, მარიკა ზაქარეიშვილი გადაცემა "ბიზნესი რუსთავი 2-თან" აცხადებს, მნიშვნელოვანია შრომის ბაზარი, ანუ ის ადამიანური კაპიტალი, რომელიც მზადდება ამ შემთხვევაში პროფესიული განათლების საფეხურზე, შრომის ბაზრის მოთხოვნებს დაუახლოვდეს.
აღნიშნული მეთოდოლოგია სხვადასხვა სექტორისთვის ადამიანური რესურსის მოძიების პრობლემის მოგვარებისა და დარგის მდგრადი განვითარების შესაძლებლობას ქმნის. ამასთან, პროფესიული კვალიფიკაციების სისტემის საერთაშორისო სტანდარტებთან დაახლოებას, პროფესიული განათლების პოპულარიზაციას, მოდერნიზაციასა და საერთო ევროპულ სივრცეში მისი ინტეგრაციას უზრუნველყოფს.
"რეალურად, მე თუ იმ უნარებს არ ვფლობ, რაც დამსაქმებელს სჭირდება, დასაქმება ძალიან გამიჭირდება და ეს ახალი მეთოდოლოგია იმას ითვალისწინებს, რომ სტუდენტები მარტო პროფესიულ უნარებს არ განივითარებენ, არის გამჭოლი კომპეტენციები – პრობლემების გადაწყვეტა, კომუნიკაციების უნარი, რაც არსებითია ნებისმიერი სამუშაოსთვის,"-აცხადებს ზაქარეიშვილი.
მისივე განმარტებით, ამასთან ერთად მნიშვნელოვანია ბიზნესის მხრიდან გადაიხედოს ის სამუშაო პირობები, რასაც ისინი სთავაზობენ და მეტად ჩაერთონ დუალურ განათლებაში (სწავლის პროცესში ბიზნესის ინტეგრაცია).
აღსანიშნავია, რომ პროფესიული უნარების სააგენტოს 2 წლიანი გეგმა აქვს, რომლის ფარგლებშიც, უკვე არსებული შეთავაზებული პროგრამების გადახედვა და ასევე ახალი კვალიფიკაციების შეთავაზება მოხდება.
