პრემიერი ვაქცინაციაზე: დაუჯერეთ მეცნიერებს და არა გავრცელებულ ჭორებს

პრემიერ-მინისტრი ირაკლი ღარიბაშვილი საზოგადოებას ვაქცინაციისკენ კიდევ ერთხელ მოუწოდებს. 

მისი თქმით, ქვეყანაში ვაქცინების საკმარისი დოზაა - ჯამში 2 მილიონი, აქედან 1.5 მილიონი ჩინური ვაქცინა, 0.5 “ფაიზერი“. ქვეყანა ვაქცინების დამატებით დოზებს კიდევ ელოდება. 

“ძალიან ბევრი კითხვა ისმის, რატომ არის აუცილებელი ვაქცინაციის ჩატარება, მთავარი პასუხია - აცრის შემდეგ გარდაცვალება, რაც ყველაზე მტკივნეულია ჩვენთვის, პრაქტიკულად გამორიცხულია. 

მინდა კიდევ ერთხელ მოვუწოდო ყველას, ჩავიტაროთ აცრა, დავიცვათ საკუთარი სიცოცხლე, ჯანმრთელობა, ამასთან ჩვენი მშობლების, შვილების, ახლობლების ჯანმრთელობა“,- აღნიშნა ირაკლი ღარიბაშვილმა.  

მისი თქმით, ვაქცინების თაობაზე სოციალურ ქსელში ძალიან ბევრი დეზინფორმაცია ვრცელდება. 

პრემიერმა საზოგადოებას მოუწოდა, დაუჯერონ მეცნიერებს და არა “ფეისბუქით“ გავრცელებულ ჭორს.