პრემიერი: ე.წ. ლოქდაუნი არ არის გონივრული გამოსავალი, დეპრესია და ნიჰილიზმი ისადგურებს 

პრემიერ-მინისტრის ირაკლი ღარიბაშვილის შეფასებით, მსოფლიოში მასშტაბური ჩაკეტვების წინააღმდეგ მიდის ყველა. ე.წ. ლოქდაუნი გონივრული გამოსავალი არ არის. თუმცა, ყველა იყენებს წერტილოვან შეზღუდვებს, რასაც საქართველომაც მიმართა. 

პრემიერის თქმით, შეზღუდვები, რომელიც ხვალიდან დაწესდება, ქვეყნის ეკონომიკურ ზრდაზე უარყოფით გავლენას არ მოახდენს. 

შეზღუდვების თავიდან აცილების მიზნით მან მოქალაქეებს ვაქცინაციისკენ კიდევ ერთხელ მოუწოდა. 

“არავინ აღარ იყენებს ე.წ. ლოქდაუნს. აკეთებენ ლოკალურ, წერტილოვან შეზღუდვებს, რაღაც გარკვეულ რეულაციებს, რაც ჩვენც დავიწყეთ. მაგრამ ჩაკეტვა არ არის გონივრული და ერთადერთი გამოსავალი, ეს არის დროებითი გამოსავალი, 1, 2 და 3 თვის, რასაც შედეგად მოაქვს კიდევ უფრო მეტი უბედურება. ადამიანები შიმშილით იხოცებიან, კარგავენ სამუშაო ადგილებს, დეპრესია და ნიჰილიზმი ისადგურებს საზოგადოებაში. ამიტომ, კიდევ ერთხელ მინდა გთხოვოთ, ჩავერთოთ ვაქცინაციის პროცესში. ვაქცინაცია არის ერთადერთი სწორი გამოსავალი, იმისთვის, რომ შევინარჩუნოთ ძლიერი ეკონომიკური ზრდა, რაც ჩვენ გვაქვს და მეორეს მხრივ, არ ჩავკეტოთ ქვეყანა. დავიცვათ ჩვენი თავი და ახლობლები“,- განაცხადა ირაკლი ღაიბაშვილმა.