პრემიერი: 1000 სამხედრო დრონის წარმოებას ვაპირებთ

პრემიერ-მინისტრის ირაკლი ღარიბაშვილის განცხადებით, საქართველოს საჰაერო თავდაცვის გაძლიერების მიზნით აქტიურად მიმდინარეობს მუშაობა. იგეგმება გრძელვადიანი გადახდის პირობებით სამხედრო შეიარაღების შესყიდვა, აგრეთვე ადგილობრივი წარმოება.

მისი თქმით, მომდევნო 4 წლის განმავლობაში საქართველოში 1 000 სამხედრო დრონს აწარმოებენ, ასევე მიმდინარეობს მუშაობა ავტომატების წარმოებაზე.

“სამინისტრო მუშაობს ისეთ პროექტებზე, რომ გრძელვადიანი გადახდის პირობებით მოხდეს მნიშვნელოვანი შეიარაღების სისტემების შესყიდვა, რომელიც არ დააწვება ბიუჯეტს იმავე წელს.

დელტას ბაზაზე ერთობლივი საწამოების პროექტზე მიმდინარეობს მუშაობა. გაისად ჩვენ გვექნება ადგილზე წარმოებული სამხედრო დრონები. მომდევნო 4 წლის განმავლობაში, ჯამში 1000 დრონის წარმოებას ვაპირებთ. ასევე ვმუშაობთ ავტომატების წარმოებაზე და სხვა უფრო მნიშვნელოვანი შეიარაღების შესყიდვაზე, მათ შორის ისრაელიდან.

კომპანია “რაფაელთან“ ჩვენ დავდეთ ხელშეკრულება, რომელიც წლის ბოლომდე უზრუნველყოფს საჰაერო თავდაცვის სისტემების და სარაკეტო სისტემების სრულ განახლებას, თანამედროვე რაკეტების შემოტანას. გარდა ამისა, უკვე მეორე დონის საჰაერო თავდაცვაზე მიდის აქტიური მუშაობა. 10 წლიან გეგმაშია გაწერილი, რომ ძლიერი საჰაერო თავდაცვა ჰქონდეს ქვეყანას მომდევნო წლების განმავლობაში“,- განაცხადა ირაკლი ღარიბაშვილმა.