პრემიერ-მინისტრობის კანდიდატად ირაკლი ღარიბაშვილი დასახელდა
„ქართულმა ოცნებამ" პრემიერ-მინისტრობის კანდიდატად ირაკლი ღარიბაშვილი დაასახელა.
პრემიერ-მინისტრობის კანდიდატმა მთავრობის შემადგენლობა და სამთავრობო პროგრამა პარლამენტს უნდა წარუდგინოს.
საკანონმდებლო ორგანო, მთავრობას ნდობას, პრემიერ-მინისტრის გადადგომიდან 2 კვირის ვადაში უცხადებს. გიორგი გახარიამ პრემიერ-მინისტრის თანამდებობა დღეს დატოვა, შესაბამისად ქვეყანას ახალი პრემიერი 4 მარტამდე ეყოლება.
მთავრობის ახალი შემადგენლობისთვის ნდობის გამოცხადებას, კონსტიტუციის თანახმად, სჭირდება პარლამენტის სრული შემადგენლობის უმრავლესობის მხარდაჭერა.
თუ პარლამენტი მთავრობას დადგენილ ვადაში ნდობას არ გამოუცხადებს, საქართველოს პრეზიდენტი შესაბამისი ვადის ამოწურვიდან არაუადრეს 2 და არაუგვიანეს 3 კვირისა დაითხოვს პარლამენტს და დანიშნავს პარლამენტის რიგგარეშე არჩევნებს.
ინფორმაციისთვის, ირაკლი ღარიბაშვილი ამ ეტაპზე თავდაცვის მინისტრის მოვალეობის შემსრულებელია. ის პრემიერ-მინისტრის თანამდებობას 2013 წლის 20 ნოემბრიდან 2015 წლის 23 დეკემბრამდეც იკავებდა.
