საზოგადოება
16/02/2021
პირბადის ტარების წესის განმეორებით დარღვევაზე ჯარიმა 50 ლარი იქნება
პირბადის ტარების წესის განმეორებით დარღვევაზე ჯარიმა 50 ლარი იქნება. ცვლილება „ადმინისტრაციულ სამართალდარღვევათა კოდექსში“ შედის, რომელსაც პარლამენტი დაჩქარებული წესით განიხილავს.
მოქმედი კანონმდებლობით, პირბადის ტარების წესის დარღვევა დახურულ საჯარო სივრცეში 20 ლარით ჯარიმდება. ღია საჯარო სივრცეში კი, პირბადის ტარების ვალდებულება მთავრობის დადგენილებით განისაზღვრა.
პარლამენტში წარდგენილი კანონპროექტით, პირბადის ღია საჯარო სივრცეში ტარების ვალდებულება კანონშიც ჩაიწერება.
კერძოდ, ცვლილების თანახმად, პანდემიის ან/და ეპიდემიის დროს ღია ან დახურულ საჯარო სივრცეში, საზოგადოებრივი ტრანსპორტით ან ტაქსით გადაადგილებისას, პირბადის ტარების წესის დარღვევა გამოიწვევს 20 ლარიან ჯარიმას. წესის დარღვევის განმეორების შემთხვევაში ჯარიმა 50 ლარი გახდება.
