პარლამენტი მთავრობისთვის ნდობის გამოცხადების საკითხს მომდევნო კვირაში განიხილავს
პარლამენტი მინისტრობის კანდიდატების საკომიტეტო მოსმენას ხვალიდან დაიწყებს.
პარლამენტის თავმჯდომარის არჩილ თალაკვაძის განცხადებით, 20-21 თებერვალს საკომიტეტო მოსმენები გაიმართება.
22 თებერვალს პრემიერ-მინისტრობის კანდიდატი და მინისტრობის კანდიდატები პოლიტიკურ ჯგუფებს შეხვდებიან. იმავე დღესვე, 15:00 საათზე გაიმართება რიგგარეშე სხდომა, სადაც დეპუტატები ნდობის გამოცხადებაზე მიიღებენ გადაწყვეტილებას.
ინფორმაციისთვის, გუშინ, 18 თებერვალს გიორგი გახარიამ პრემიერ-მინისტრის თანამდებობა დატოვა. „ქართულმა ოცნებამ“ გუშინვე მის შემცვლელად ირაკლი ღარიბაშვილის კანდიდატურა დაასახელა. დღეს კი, პრემიერობის კანდიდატმა მთავრობის ახალი შემადგენლობა წარადგინა.
მინისტრთა კაბინეტში მცირე ცვლილებებია. ირაკლი ღარიბაშვილმა თავდაცვის მინისტრობის კანდიდატად ჯუანშერ ბურჭულაძე წარადგინა, რეგიონული განვითარებისა და ინფრასტრუქტურის მინისტრს მაია ცქიტიშვილს კი, მისი მოადგილე ირაკლი ქარსელაძე ჩაანაცვლებს. კაბინეტის დანარჩენი შემადგენლობა უცვლელი რჩება.
