პაატა იმნაძე: ვაქცინაციის შემდეგ 10-14 დღე ფრთხილად უნდა ვიყოთ
დაავადებათა კონტროლის ეროვნული ცენტრის ხელმძღვანელის მოადგილის პაატა იმნაძის განცხადებით, კოვიდ ვაქცინის შემდეგ აუცილებელია პრევენციული ღონისძიებების დაცვა, რადგან ორგანიზმს იმუნიტეტის გამოსამუშავებლად დრო სჭირდება. ეს პერიოდი კი, 10-14 დღეა.
“პირველი დოზის შემდეგ გარკვეული იმუნური პასუხი გამომუშავდება ჩვენს ორგანიზმში, მაგრამ ამას სჭირდება დრო. დაახლოებით 10-14 დღე მაინც არის საჭირო, რომ ორგანიზმში რაღაც დაცვა წარმოიქმნას. იმუნური პასუხი რომ გამომუშავდეს ორგანიზმში, ამ პერიოდში ძალიან ფრთხილად უნდა ვიყოთ.
აქვე განვმარტავ, ძალიან ბევრი მითი არსებობს იმის შესახებ, რომ თუ თქვენ უკვე ინფიცირებული ხართ, ან აცრის შემდეგ ძალიან მალე დაინფიცირდით, ეს შეიძლება დამატებითი რისკი იყოს. არავითარ შემთხვევაში, ეს დამატებითი რისკი არ არის. უბრალოდ უნდა ვიცოდეთ, რომ ჯერ კიდევ ორგანიზმი დაცული არ არის ინფექციისგან. ამიტომ, პირბადე, დისტანცია, თავყრილობებისგან თავის არიდება, ეს არის გადამწყვეტი, რადგან აცრის შემდეგ ორგანიზმა მოასწროს იმუნიტეტის გამომუშავება. მერე უკვე შეიძლება ნაკლებად ფრთხილები ვიყოთ“,- აღნიშნა პაატა იმნაძემ.
NCDC -ის ინფორმაციით, ამ დროისათვის ქვეყანაში შესაძლებელია ვაქცინაცია “ასტრაზენეკათი“, რომელიც ხელმისაწვდომია 45 წლის ზევით მოსახლეობისათვის, ასევე მიმდინარეობს “ასტრაზენეკათი“ აცრილების რევაქცინაცია. თითქმის დასრულდა “ფაიზერით“ სრულად ვაქცინაცია, ამ დროისათვის “ასტრაზენეკათი“ და “ფაიზერით“ სრულად ვაქცინირებულთა რიცხვია 19 392. პარალელურად მიმდინარეობს “სინოფარმის“ მეორე დოზით აცრა. 24 მაისიდან ქვეყანაში დაიწყო სინოვაკის ვაქცინით აცრები, რომელიც ხელმისაწვდომია 18 წლის ზევით ასაკის პირებისთვის.
