ნათია თურნავა: ზემო ნამახვანის კვლევებში მოსახლეობას აქტიურად ჩავრთავთ
ეკონომიკის მინისტრის ნათია თურნავას განცხადებით, ზემო ნამახვან ჰესის პროექტირება-შესწავლაში ადგილობრივი მოსახლეობა და მათთვის სანდო ექსპერტები ჩაერთვებიან.
ამასთან, მისი თქმით, პროექტის განმახორციელებელ კომპანიას მოსთხოვენ, რომ ადგილობრივი მოსახლეობა გადაამზადონ და მაღალანაზღაურებად პოზიციებზე დაასაქმონ.
„მოსახლეობას პირობა მივეცით, რომ მეტი ჩართულობა იქნება ზემო ნამახვანის პროექტირება-შესწავლაში, მათი სანდო ექსპერტები ჩაერთვებიან. ზემო ნამახვანზე ჯერჯერობით ნებართვა გაცემული არ არის. კვლევები ახლა მიმდინარეობს.
ქვემო ნამახვანს თუ რაიმე კომუნიკაცია დავაკელით, ეს პრობლემა ახლა სხვაგვარად უნდა გადავწყვიტოთ.
რა თქმა უნდა დასაქმებაც მნიშვნელოვანია. ხეობის მოსახლეობა უნდა დასაქმდნენ არა უბრალოდ რიგით პოზიციებზე, არამედ უფრო მაღალკვალიფიციურ და მაღალანაზღაურებადზე, რისთვისაც აუცილებელია ცოდნა. ჩვენ კომპანიას მოვთხოვთ, უზრუნველყოს მოსახლეობის მომზადება-გადამზადება, რათა მათ მეტი გამოცდილება შეიძინონ, უფრო მაღალი რანგის ინჟინრები მომზადდნენ, პროცესში თვითონ ჩაერთონ და იმუშაონ“,- განაცხადა ნათია თურნავამ ცაგერში, „ნამახვანი ჰესის“ პროექტის შესახებ ადგილობრივ მოსახლეობასთან შეხვედრის შემდეგ.
მისი თქმით, შეხვედრები მოსახლეობასთან გაგრძელდება.
