"მცირე შემოსავლიანებს საგადასახადო შეღავათი დაუწესდეთ" - კანონპროექტი პარლამენტში
ოპოზიციონერი დეპუტატი გიორგი ვაშაძე პარლამენტს ინიციატივით მიმართავს, რომ მცირე შემოსავლიანებმა 6 თვით ისევ ისარგებლონ საგადასახადო შეღავათით საშემოსავლო გადასახადის გადახდის ნაწილში.
ცვლილებას “საგადასახადო კოდექსი“ ითვალისწინებს, რომელიც პარლამენტშია რეგისტრირებული.
როგორც ინიციატორი განმარტავს, კორონავირუსის პანდემიის გამო კოდექსში შეტანილი ცვლილებით, მოქალაქეთა გარკვეული ნაწილი საშემოსავლო გადასახადისგან გათავისუფლდა, კერძოდ თვეში 750 ლარამდე შემოსავლის ნაწილში.
კანონპროექტის მიხედვით, 6 თვით გაგრძელდება აღნიშნული შეღავათი. კერძოდ, დამქირავებელი უფლებამოსილი იქნება შეიმციროს (სახელმწიფო ბიუჯეტში არ შეიტანოს) დაქირავებულისთვის გაცემული 750 ლარამდე ხელფასიდან დაკავებული და გადასახდელი საშემოსავლო გადასახადი, თუ ამ დაქირავებულის მიერ ამავე დამქირავებლისგან 1 თვის განმავლობაში მიღებული ხელფასი 1 500 ლარს არ აღემატება.
კანონპროექტის ინიციატორის თქმით, იმ ფონზე, როდესაც კორონავირუსის პანდემია არ დასრულებულა, ეკონომიკის ვარდნა გრძელდება, სამომხმარებლო პროდუქციაზე ფასები იზრდება, მოქალაქეთა შემოსავლები მცირდება, შესაბამისად, კანონპროექტის მიღება ხელს შეუწყობს მცირე შემოსავლიან გადასახადის გადამხდელებს შეუმსუბიქდეთ საგადასახადო ტვირთი.
