მთავრობა "ბორჯომის" დირექტორთა საბჭოს თავმჯდომარის კანდიდატურაზე შეთანხმდა
მთავრობა "ბორჯომის" დირექტორთა საბჭოს თავმჯდომარის კანდიდატურაზე უკვე შეთანხმდა.
ეკონომიკის მინისტრის ლევან დავითაშვილის განცხადებით, მისი ვინაობა უახლოეს მომავალში გახდება ცნობილი.
"დირექტორთა საბჭოს თავმჯდომარეს ნიშნავს სახელმწიფო. მთავრობამ უკვე შეათანხმა კანდიდატები - 1 დირექტორის და 1 დამკვირვებლის კანდიდატურა. უახლოეს პერიოდში მოხდება სარეგისტრაციო დოკუმენტების ცვლილება. შესაბამისად, ეს ინფორმაციაც საზოგადოებისთვის იქნება საჯარო. გადაწყვეტილებას ვიღებთ კომპეტენციის შესაბამისად, საუბარია დამოუკიდებელ და არა სამოხელეო პირებზე", - აღნიშნა ლევან დავითაშვილმა.
სახელმწიფო "ბორჯომის" ქარხნის თანამფლობელი გახდა. მთავრობას კომპანიის 7.73%-იანი წილი უსასყიდლოდ გადაეცა.
შეთანხმების შედეგად: მაკონტროლებელ აქციონერს აღარ აქვს IDS BORJOMI International-ის მაკონტროლებელი ფუნქცია. ასევე, IDS BORJOMI International-ის დირექტორთა საბჭოში მაკონტროლებელი აქციონერის წარმომადგენლობა 8-დან 2 წევრამდე შემცირდა.
