მოლებში ვაქცინაციის ცენტრების მოწყობა იგეგმება - ივლისიდან პროგრამა გაფართოვდება

ივლისიდან ვაქცინაციის პროგრამა გაფართოვდება, როგორც თბილისში, ისე რეგიონებში.

ჯანდაცვის მინისტრის მოადგილის თამარ გაბუნიას განცხადებით, შეიქმნება ვაქცინაციის დამატებითი ადგილები და დაემატება ბრიგადები. ვაქცინაციის ცენტრები მოეწყობა როგორც სამედიცინო დაწესებულებებში, ისე საზოგადოებრივ სივრცეებში. კონსულტაციები მიმდინარეობს მოლებთან.

“ჯამურად, დღეს ქვეყნის მასშტაბით მოქმედებს 200-მდე ბრიგადა. დამატებით კიდევ საჭიროა თითქმის ამდენვეს მობილიზება. ყველაზე ნაკლები დამატებითი საჭიროებაა თბილისში, თუმცა დედაქალაქში დღეს მაღალი მოთხოვნის გამო, ადგილები მუდმივად შევსებულია. მაგრამ, რეგიონებში, იმისთვის, რომ მოსახლეობის მოცვა მოხდეს შესაფერისად და თვის მანძილზე ჩვენ მივიღოთ საკმარისი რაოდენობა ვაქცინირებული ადამიანების, საჭიროა დამატებითი ბრიგადების მობილიზება რეგიონებშიც. მაგალითად, თუ დღეს თბილისში მოქმედებს 94 ბრიგადა, საჭიროა დამატებით 28 ბრიგადის მობილიზება. იმერეთში მაგალითად დღეს მოქმედებს 18 ბრიგადა, საჭიროა 31 ბრიგადის მობილიზება.

ვაქცინაციის ცენტრები მოეწყობა საზოგადოებრივ ცენტრებშიც. ჩვენ უკვე დაწყებული გვაქვს კონსულტაციები მოლებთან. ასევე გამონახულია დიდი სივრცეები, სადაც სამედიცინო დაწესებულებები თავად აიღებენ პასუხისმგებლობას ვაქცინაციის სივრცის მოწყობაზე და იქ ჩაატარებენ უკვე ვაქცინაციას. ასევე იგეგმება რეგისტრაციისთვის დამატებითი ადგილების შექმნა“, - აღნიშნა მინისტრის მოადგილემ.

მისი თქმით, სამედიცინო რეზიდენტები ივლიან საჯარო სამსახურებში, საზოგადოებრივ ადგილებში, რადგან დაინტერესებულ პირებს აცრების შესახებ ინფორმაცია მიაწოდონ და რიგის დაჯავშნაში დაეხმარონ.

“ჯანმო სახელმწიფო სამედიცინო ჰოლდინგთან ერთად უკვე ახორციელებს  ე.წ. ვაქცინაციის ოფიცრების პროგრამას, რომელშიც ჩართულები არიან სამედიცინო რეზიდენტები, მაღალი კურსის სტუდენტები. ისინი ტაბლეტებით არიან აღჭურვილები და ივლიან მაგალითად სკოლებში, სხვა საზოგადოებრივ ადგილებში, საჯარო სამსახურებში, იმისთვის, რომ დაინტერესებულ პირებს მიაწოდონ ინფორმაცია აცრების შესახებ და ასევე დაეხმარონ მათ რიგის დაჯავშნაში“,- განაცხადა თამარ გაბუნიამ.

მინისტრის მოადგილის განცხადებით, მუშაობა მიმდინარეობს საინფორმაციო კამპანიის გაფართოების მიზნით.

“მსოფლიო ბანკის ხელშეწყობით გამოვლინდა კომპანია, რომელიც დაგვეხმარება ჩვენ კამპანიის წარმოებაში. ასევე მიმდინარეობს ბრიტანეთის მთავრობის ხელშეწყობით საინფორმაციო კამპანია, გვეხმარება ჯანმოც“, - აცხადებს თამარ გაბუნია.